Med sjølvlaga perler
Når Galleri Oz laurdag opnar ny utstilling er det mellomanna med ein sølvsmed som har konvertert til glas.
Laurdag opnar Galleri Oz på Kyrkjeflaten salsutstillinga "Vi smykker oss". Ei utstilling der 10 kvinnelege kunstnarar viser forskjellige formar av ting å smykke seg med. Blant anna kan ein få sjå produkter frå kunst av glas og porselensperler, nanofilt, batikk og gyllenlær.
Frå sølv til perler
Ein av utstillarane, Lise Nilsen, busett på Voss, driv med glas- og porselensperler. Ho utdanna seg som sølvsmed på 70-tallet og etter ein 25 år lang pause starta ho opp igjen i 2003.
-Då eg starta som sølvsmed for mange år sida var det ikkje snakk om å bruka glas til smykker. Så då eg starta opp igjen denne gongen ville eg gjera som eg sjølv ville, fortel Nilsen.
Forskjellen på glas og porselen er at glass gjer lys og er transparent. Ho starta med kjøpte perler, men no lagar ho alt sjølv. -Det er veldig spanande å laga perler. Ei perle kan ta alt frå to minutt til ein time å laga.
Glasmykka er laga av spesialglas og tåler mykje meir enn vanleg glas.
Nanofilt og gyllenlær
Marita Haugen frå Samnanger driv med kunstformen nanofilt.
-Det betyr ull på stoff, eg bruker ull på silke. Haugen lagar sjal og bilder. Skåler lagar ho òg, men meir på privat basis.
Utstillaren Lise Søyland driv med kunstformen gyllenlær. Gyllenlær er eit kunsthandtverk med lange tradisjonar, og er blitt beteikna som eit av dei mest eksklusive handtverk som finst. Ein brukar vegetabilsk garva skinn som ein etter klargjering dekker med bladgull eller sølv/aluminium.
Det er ein lang prosess å laga gyllenlær, det tek fleire månader før skinnet er klar for siste behandling.
Alt er for sal
Dei ti utstillarane er Lise Nilsen, Marita Haugen, Liv Søyland, Marit Beate Haneberg, Helle Tangen,Heidi Mortensen ,Hilde Fossen, Else Lier , Marte-Katrine Parmann og Reidun Røste.
-Alt ein ser i utstillinga er for sal, fortel Turid Parmann, ei av dei som driv Galleri Oz.
Skal ein til dømes i konfirmasjon og leitar etter den perfekte gåva, bør ein ta turen innom og sjå på alt det fine dei har å tilby.
Utstillinga varer frå 21. april til 23. juni.