– Medlemmane skal bli sett

I juni blei det kjent at den tidlegare storsymjaren Fritz Warncke opnar treningssenter i Irisgården.

– Vi ligg i rute til opning cirka 1. september, men ting skal falla på plass i rett rekkjefølge. No har vi i alle fall fått staben på plass.

– Charlotte Johannesen blir senterleiar og får med seg Silje Martine og Simon i den faste staben.

– I tillegg nyttar vi personlege trenarar frå eit samarbeidande firma, slik som vi gjer på senteret vårt på Askøy.

– Dei vil tilby både individuell trening og trening i grupper over ein periode på 10 veker.

– Det er ei ordning som har fungert særs godt, fortel Warncke då Midtsiden møter han og den nye senterleiaren mellom arbeidarar og byggematerialer i Irisgården.

– Ho veit kva kunden vil ha

Warncke får ikkje fullrost den nye senterleiaren sin godt nok.

– Ho er akkurat ein slik type eg var ute etter til stillinga.

– Blid, hyggeleg, smilande, men samstundes med bein i nesa og med teft for orden i sysakene.

Johannesen blir nesten forlegen av alt skrytet frå den nye sjefen.

– Eg har ikkje vore i bransjen tidlegare, men har bakgrunn som handballspelar og har trent mykje på treningssentre oppigjennom tida.

– Eg veit i allefall kva eg sjølv tykkjer er bra og ikkje bra på eit senter, smiler Johannesen.

– Nettopp difor meiner eg ho vil gjera ein god jobb for oss, skyt sentereigaren inn.

Reint og ryddig, utan singlet

Ei av oppgåvene til Johannesen blir å sjå til at senteret blir driven etter Warncke sine klare retningsliner.

– Mine sentre skal vera reine og ryddige.

– Medlemmane skal bli møtt med eit smil og bli sett når dei kjem og når dei går.

– Senteret blir betjent i kjernetida frå 9 til 21 kvardagane heile veka, det er ein av kjepphestane eg har, forklarar Fritz Warncke.

– I tillegg skal vi vera eit vaksent senter. Aldersgrensa er 18 år, og det er ikkje lov med singlet.

– Der opplever eg at Charlotte og eg deler dei same haldningane.

På dei to andre sentera han driv, på Askøy og i Laksevåg, er snittalderen på medlemmane 37 år, med dei eldste medlemmane på henhaldsvis 89 og 85 år.

Virtuell spinning og musikk-app

Ein av nyvinningane på Energi Treningssenter er virtuell spinning.

– Det er spinningklassar med storskjerm, kor instruktøren og løypa ein skal igjennom visast på lerretet.

– Vi jobbar no med ein app, som skal fungera både på iphone og androide-telefonar, som speler musikken direkte i øyrepluggane til den som deltek.

– På den måten forstyrrar ikkje spinningtimen, dei som driv med anna type trening i lokalet.

– Forhåpentlegvis klarar vi å få den på plass til opninga, fortel dei to.

Godt motteke

Dei to fortel om ei god mottaking på Os.

– I helga sto vi på stand på Amfi, og det var berre godord å høyra.

– Konkurransen som no blir på Os, med fire treningssentre er berre sunt. Det gjer at vi må vera skjerpa, smiler Johannesen.

– Men korleis har innmeldinga vore etter at de lanserte senteret?

– No har eg ikkje sjekka den siste veka, men det har sige jamt og trutt på.

– Éin dag har det kome seks-sju innmeldingar, andre dagar éin.

– Bilete ser ganske likt ut som då eg starta opp på Askøy og Laksevåg. Der hadde vi mellom 300 og 500 medlemmar då vi opna, avslutter Fritz Warncke.