Fleire båtar enn tidlegare har lagt turen til Os gjestehamn. Her frå brygga ved Oseana onsdag 11. juli (foto: Andris Hamre)

Meir enn dobla besøk i hamna

437 registrerte overnattingar i hamna i juni og halv juli. Det er meir enn det doble av begge dei to månadane i fjor.

Av: Andris Hamre

Inntrykket når ein har rusla i hamna i sommar er at det er mange turistar, både i båt og i bubil, som legg turen til Os. Næringssjef Daniel Skotheim stadfestar no inntrykket.

– I 2016 hadde vi totalt 204 overnattingar i juni og juli. I 2017 var tilsvarande tal 217. I år har vi så langt 437 overnattingar i heile juni og halve juli, så det er meir enn ei dobling og ei formidabel utvikling, strålar næringssjefen.

50 bubilar

I appen GoMarina får næringssjefen skilt statistikken på båtar og bubilar.

– I appen har vi registrert 50 bubilar i juni/juli. Samstundes så ser vi at automaten på brygga har ei dobling frå i fjor. Mykje av denne auka er truleg bubilar, som ikkje er like vant til å bruke appen som det båtfolket er, trass i at vi etterkvart har fått ei ganske god skiliting av moglegheitene, seier Skotheim.

Håper på effekt for handelen

Næringssjefen er naturleg nok oppteken av om turismen gir auka omsetning for dei næringsdrivane.

– Det er ei veldig gøy utvikling og enno gøyare er det om dei næringsdrivande i sentrum også opplever ei auke i omsetting. No har eg nett kome heim frå ferie, så eg har ikkje fått høyrd med dei som driv handel og restaurantar på Osøyro, men inntrykket frå dei som har vore på jobb her på huset har i allefall vore at det har vore meir folk i sentrum i år.

– Dette liker vi, avsluttar Skotheim med eit smil.

Fleire saker