– Mi største utfordring så langt

Tidlegare i august sprang Salomon-løpar Thomas til toppen av Mont Blanc og ned igjen på under ti timar, på ein treningstur med kameraten Thorbjørn Ludvigsen.

I ettermiddag deltar han for tredje år på rad i North Face Ultra Trail du Mont Blanc, men i det lengste av dei fire løpa i konkurransen.

– Eg har aldri løpt eit så langt løp før, seier Thomas om den 168 km lange løypa med 9600 høgdemeter opp og ned.

I fjor sprang han 119 km på tida 16:17 og hamna på ein fantastisk 7. plass av over 1000 kvalifiserte løparar.

Topp 10 av 2300?

– Målet er å koma blant dei ti beste og dermed få ein plass på pallen, seier Thomas, som dei siste dagane har vore tilbake i Mont Blanc-området for siste førebuingar.

– Eg kom ned her måndag og har trent som normalt. Øktene har vore i eit roleg tempo og formen kjennest grei ut. Med all den gode treninga den siste tida ventar eg mykje av meg sjøv. Men dei 2300 andre deltakarane har nok også trent godt, så det blir heilt sikkert hard konkurranse.

Sjå film og følg løpet på spot

Løpet startar klokka 17.30.

På thomasandersen.no kan du sjå reklamevideo om løpet og finna link til spot, der du kan følgja Thomas utover fredagskvelden og natt til laurdag.