Miljøbevisst ungdom på tokt i fjøro

Bildeserie:

Full skjerm

1 av 10

– Vi er midtvegs i ei miljøveke her på skulen, seier lærar i naturfag og skulen sin miljøkoordinator, Silje Samnadalr. Det er første året med ei miljøveke på Os vgs, men det er meininga det skal bli eit fast arrangement for skulen kvar haust.

– Os Vidaregåande Skule er allereie ein miljøsertifisert Grønt flagg-skule, seier Samnadalr. Målet er å bli ein Miljøfyrtårn-sertifisert skule.

Sjølvvald miljøfokus

Tema for årets miljøveke er «kjeldesortering», men elevane får sjølv velja prosjekt innanfor temaet.

– Vi ser på haldningar, relevant kjeldesortering i høve til dei faga vi underviser i her på skulen, vi skal på besøk til BIR i Espehaugen, og vi skal sjølvsagt plukka boss.

– I tillegg er det klassar som har prosjekt om å laga skulpturar av plastavfall og byggja avfallsbehaldarar til verkstadane her på skulen.

Tankjevekkande resultat

I dag var det plukking av boss og kjeldesortering på timeplanen for mange av elevane. Ei gruppe var i Ervikane og ei gruppe var i Smievågen og i Moldafjøro.

– På dei to timane vi har vore her har vi plukka og sortert vel 2 kubikkmeter med boss, seier faglærar ved Os vgs, Magnus Bertil Milde.

– Det var heldigvis ikkje så mykje å gjera i Smievågen, men Moldafjøro var verkeleg ein augeopnar for elevane.

– Ein ting er det uorganiske bosset vi no tek med oss. Her er det tydelege gjengarar seier Dan-Jarle Køhler Raustein, kontaktlærar ved Os vgs.

– Vi har funne veldig mykje plast som kjem frå landbruket. Dette er den same plasten ein finn i rundballeproduksjonen. Korleis den har hamna på sjøen er eit veldig interessant spørsmål, meiner Køhler Raustein.

– I tillegg tek vi no med oss mykje boss og plastrestar frå dei som faktisk nyttar sjøen, anten til næring og fritid legg Milde til.

Dei to lærarane er samde om at det er urovekkjande å finna såpass mykje restar av tauverk på éi enkel strand i Os.

Det største problemet er det minste

Miljøarbeidar ved Os Vidaregåande Skule, Torill Moberg, seier besøket i Moldafjøra i dag vart ei todelt oppleving for elevar og lærarar;

– Elevane får verkeleg sjå konsekvensane av kva som skjer med miljøet i nærområdet deira. Samstundes får dei ei positiv oppleving av at det vert synlege resultat berre med eit par timars innsats.

– Det som er trist er alt det vi ikkje rakk ta med oss i dag. I all tangen, og i det organiske materialet som ligg att på stranda ligg det framleis store mengder plastavfall.

– Skulle vi ha sortert ut dette kunne vi halde på i dagevis, om ikkje vekevis. Og det berre her i Moldafjøro.

Attende på skulen var det fleire av elevane som var overraska over kor mykje plast dei faktisk fann, og kor smått mykje av det var. Ikkje minst det å oppdaga at kvardagslege ting som q-tipspinnar var i så store mengder på stranda.

Om nokon skulle lura, så fylte elevane i Ervikane ein heil hengar med boss på den tida dei var der.