Adrian Valle med dagens største fangst, ei lange som vog 17,7 kilo etter å gulpa opp ein fisk på rundt 2 kilo. (Foto: Kjetil Vasby Bruarøy)

– Min største fangst i Noreg til no!

Adrian Valle fekk eit beist av ei lange på stang utanfor Os hamn i dag.

image
image
image
image
Av: Kjetil Vasby Bruarøy

Hobbyfiskar Adrian Valle kom i ettermiddag til land etter fire fine timar på fjorden. Etter å ha fått to passeleg store langer på kroken, var det tyngre saker som hang i snøret.

– Eg fiska med to stenger, men bestemte meg for at det var nok med to. Mens eg sulte inn det eine snøret såg eg at det var fisk på den andre. Men eg trudde ikkje den var så stor.

Så byrja snella på den andre stanga å gje etter, trass i at bremsen var stilt rimeleg stramt.

– Då skjønte eg at det var noko stort på gang!

Nærmare 20 kilo

Adrian seier han synest det var heilt vilt å dra opp den store langa.

– Med det same eg fekk den om bord så gulpa den opp ein annan fisk. Denne vog truleg rundt to kilo.

Etter å ha tømt magesekken vog den 143 cm store langa 17,7 kilo!

Fisken blei tatt på stang berre nokre hundre meter frå Os hamn, på ein angel egna med knurr og supplert med enkelte finesser.

– Så no blir det fisk til middag nokre dagar?

– Eg plar å filetera og lager ofte fiskekaker. Men eg har allereie fryseren full, og eg forsyner også familien med fisk. No har eg plenty å gje vekk.

Langer kan bli opptil 210 cm lang og 45 kilo tung, ifølgje Wikipedia.

Har tatt større fisk i utlandet

På spørsmål om dagens fangst er ny personleg bestenotering svarer Valle:

– Ja, det er den største eg har tatt i Noreg.

I sommar var Adrian i Alaska for å fiska, men den største fangsten han har tatt utanlands blei tatt i Thailand.

– Det var ei malle på 40 kilo. Eg meiner dei kalla fisken rødmalle.

Avslører fiskeplassen

I dag blei det i alt fire langer. Etter at beistet på 17,7 (19,7) kilo kom om bord tok han ei «lita» ei på 6,4 kilo.

I tillegg fekk han ein ganske stor kvitting.

– Røper du kor du fekk fisken?

– Ja. Den blei tatt mellom Sandholmane og Raudholmane på rundt 100 meters djupne.Det plar vera greit fiske der, men det er ikkje kvar dag den bit som i dag.

• Er du glad i å lesa om lokal fangst? Sjå Midtsiden si samleside: Jakt og fiske