Moldskred signerte med Os

Mats Cato Moldskred (27) teikna i dag amatørkontrakt på eitt år med Os Turn Fotball.

Han blir i tillegg tilsett i full stilling i klubben.

– Dette er naturlegvis veldig kjekt for oss. Mats Cato er ein spelar med ekstreme eigenskapar og vi kjem til å få stor glede av han både på og utanfor banen, seier sportssjef Lars Bakkerud.

– Mats Cato blir tilsett som instruktør på fotball-fritidsordninga vår i tillegg til at han får ansvar for komande prosjekt, som eigne akademi for ungdom og juniorar, seier dagleg leiar Hans Parnefält.

Seks år sidan sist

Moldskred debuterte på A-laget til Os som 17-åring, blei henta til Fana i 2003 og kom tilbake til Os éin sesong, då Os sesongen etter opprykk til 2. divisjon var eitt poeng frå 5. plass på nytt nivå (landa på 7. plass).

Så gjekk turen til Løv-Ham og Adeccoligaen for Mats Cato, som då var 22 år. Etter to sesongar gjekk han til Bryne på same nivå.

Etter å ha spelt for Bryne i 2010 og 2011 gjekk han til nest øvste nivå i Sverige, Superettan, der han no har hatt to sesongar for IK Brage.

Osingen blei, som i Løv-Ham, kåra til årets spelar, men IK Brage rykte ned noko som førte til annulert kontrakten og heimreise eit år før tida.

Ein god pakke

Etter retur til heimbygda var Mats Cato rask med å stilla på Kuventræ på trening. Men det tok tid før han bestemte seg for å spela med moderklubben i 2014.

– Eg ville sjå kva som eventuelt dukka opp av tilbod og interesse frå klubbar på høgare nivå. Noko interesse har det vore, eg har også fått tilbod som kunne gjort med til fulltidsspelar igjen, men det har vore tilbod eg ikkje har vore heilt komfortabel med, seier Mats Cato.

– Eg sa tidleg ifrå om at viss ikkje det dukka opp noko som var interessant nok, så var det veldig aktuelt å spela for Os.

– Det er godt å vera tilbake i moderklubben og opplegget klubben har sydd saman for meg gjer at eg kan utvikla meg vidare både som spelar og som person.

– Rask og morosam

Både Bakkerud og hovudtrenar for Os, Jørn Vegard Berge, set pris på både nivået og humøret til Mats Cato.

– Han er i veldig god form, minst like rask som før og med nokre farlege skot. Han kan lett skåra over 20 mål for oss i 3. divisjon, seier Jørn Vegard.

– I tillegg er han utruleg morosam fyr å ha på trening, han elskar fotball og er veldig glad i å trena. I tillegg har han eit godt humør som smittar over på oss andre. Han er eit veldig fint forbilde for ungdomane i klubben, synest Berge.

Naturleg utviding

Os Turn har godt frå å vera driven på dugnad til først å få ein dagleg leiar for fotball- og handballgruppa, Leif Idar Røen i 50 prosent stilling, så ein dagleg leiar for hovudlaget, Hans Parnefält, for før jul å tilsetja Lars Bakkerud som sportssjef i fotballgruppa i 60 prosent stilling.

No kjem Moldskred inn i 100 prosent stilling for fotballgruppa. Har det dukka opp ein rik onkel på Kuventræ?

– Nei. Men er det potensiale så må du utvida for å henta dette ut. Set du deg mål så kan du ikkje berre snakka, du må handla, seier Hans Parnefält.

– Eg ser ikkje på dette som risiko, men ei naturleg utviding av ein klubb i ekspansjon.

Han starta Vitaltour i 2002, ei gasellebedrift som på 10 år vaks til ein omsetnad på 68 millionar kroner før Hans selte aksjane sine og engasjerte seg i idrettslaget.

– At folk ser at det skjer noko her oppe har nok sin effekt på sponsorar, men vi har også mykje å ta vare på og utvikla i denne store klubben.

Frå playstation til frisk luft

Både medlemstalet og inntektene har auka det siste året, og Hans ser for seg vidare vekst, ved sidan av betre sportsleg utvikling, med auka bemanning.

– Fotballfritidsordninga, Telenor Xtra, har vore ein suksess. Her har vi no 31 ungar frå 1 til 4 dagar i veka, og cirka 70 prosent belegg.

– Mats Cato er super å ha som instruktør for dei unge spelarane, tenk å få ein goalgettar med erfaring som utanlandsproff som forbilde og trenar. I tillegg til å vera god sportsleg, er han opptatt av å motivera ungane til å trena meir, vera meir utandørs.

– Eg er glad i playstation eg òg, innrømmer Moldskred.

– Men tenk om ungane i aukande grad ser glede og nytte av å bruka ledig tid i hagen med ball i staden for på iPad eller playstation. På FFO har eg ungar ned til 8 år i alder, spelarar som kanskje berre trenar éin til to gongar i veka.

– Med fotballfritidsordning får dei seg ei ekstratrening, eller fire, avhengig av kor mange dagar dei går her. Det kan bety ekstra mykje for ungar som elles ikkje driv mykje eigentrening.