Mot nye høgder i Handlegården

Bildeserie:

1 av 4

Det var hausten 2012 at Joa Gruppen kjøpte den til saman 8000 kvadratmeter store eigedomen ved elva i Os sentrum.

I desse dagar er heile den øvste etasjen fjerna, og det er høg aktivitet i alle endar av bygget.

• Les og: Vil bygga 6 + 17 leilegheiter (2014)

– Vi kjem til å byggja to nye etasjar, seier André Angelskår frå Joa Gruppen AS.

– Når ombygginga er ferdig vil Handlegården ha totalt 5 etasjar, mot 4 tidlegare.

Vil stå fram som nytt

– Vi har god framdrift no, seier Angelskår.

– Sjølv om det nett no er tauklaust og det er mykje synleg aktivitet i Brugata, reknar vi med å ha tett tak til nyttår.

Angelskår er glad for dei nye og synlege tiltaka som har vært gjort i Os sentrum dei siste åra, og han trekk spesielt fram det vi kan sjå på gateplanet.

– Eg er imponert over korleis Os kommune held framdrifta i arbeidet med Os sentrum. Det nye dekket og baldakinane har verkeleg endra mykje på gateplanet. No kjem vi med eit tydeleg løft i høgda òg.

– Bygget vil få ein moderne og flott fasade. Handlegården vil ikkje vera til å kjenna att, fortel Angelskår entusiastisk.

Næring og husvære

Sjølv om Capri nyleg flytta ned ein etasje og rundt hjørnet til dei tidlegare lokala til iSushi, er det framleis aktivitet i bygget.

– Tannlegane og treningssenteret held fram i bygget, men vi har vald å venta med å leggja ut dei nye næringslokala og leilegheitane til vi er heilt ferdig med arbeidet.

– Det er ikkje eit høgt press på lokale i Os nett no, så vi har trua på sal når bygget står heilt ferdig.

Joa Gruppen AS har allereie ferdigstilt 1000 kvadratmeter med parkeringsareal, mellom anna i lokalet kor ein tidlegare kunna dansa på Madammen. Dette vonar Angelskår skal vera med å gjera både næringslokala og husværa attraktive for sal.

– Som ein del av rekkjefølgekrava kjem vi òg til å laga eit lite kaianlegg mot Oselva. Her kjem det eit fint uteområde med benkar kor ein nyta utsikta og elva.

Noko for alle

André Angelskår og Joa Gruppen AS ser fram til å setja i gong med det innvendige arbeidet over nyttår, og reknar med å kunna presentera eit heilt nytt bygg i Os sentrum til neste år.

– Her vil det vera gode alternativ for alle. Vi vil kunna gå ut til ei spredt kjøpargruppe, og vi kan garantera mykje god utsikt.