Bildeserie:
Børrea Schau-Larsen, eigar og drivar av Solstrand Hotel og Bad og Sjur Frimann Hjeltnes, partner i ABO Plan & Arkitektur delte på folkemøtet om utviklinga av Hamnetomta, sine tanker om kva veg ein bør gå.
– Det handlar om å ta ein posisjon.
– Sett i eit internasjonalt perspektiv så er det vidsynet til fjella og lyset i fjorden som trekker gjester til Os.
– La oss heile tida ha nærleiken til dette med oss.
– Vatn er ein unik ressurs i verda.
– Møtet mellom elva og fjorden er ein unik ressurs i Os, som vi må utnytta til det fulle, innleia Schau-Larsen.
Parken ved fjorden
Hotelldirektøren var tydeleg på at når ein skal utvikla hamnetomta, så må det sansande menneskje settast i fokus.
– Dei immaterielle veridane er heilt sentrale.
– Det skal følast godt å vera menneskje i Os. Hamnetomta må vera ein plass for liv, latter og lek, slik som parkane i Oslo har blitt det.
– Det har blitt Oslo sine nye storstover, la vår park ligga ved sjøsiden.
– La oss sikra oss rom for det, oppmoda Schau-Larsen som òg såg for seg ein marknad med friske grønsaker og sjømat.
Rå natur og arkitektonisk kvalitet
Schau-Larsen fortalde at ho har trua på kombinasjonen naturen og arkitekturen.
– Eg trur på kombinasjonen av vakker rå natur som vi har i Os kombinert med arkitektonisk kvalitet.
– Skal vi skapa interesse i framtida må vi heile tida strekkje oss og våga det ukjente.
– La Sotra halde på med sitt, mens vi skaper vårt Osøyro for framtida. Det er ein veldig spennande moglegheit.
Må sjå fjorden
Frimann Hjeltnes delte Schau-Larsen sitt ønskje om å skapa ein marknadsplass og eit torg på hamnetomta.
– Men vi må òg sikra minst to siktliner frå sentrumsgatene og utover fjorden.
– Eg tok meg ei runde i helga. Det trengs ei opprydding, påpeika Frimann Hjeltnes som presenterte ei ni-punkts liste for kva han meinte Os kommune burde tenkja på.
- Tomta er lita, viktig og er metta med symbol for Os. Osøyro er eit atraktivt, levande regionalt og kommunalt senterområde.
- Tomta er del av eit terminalområde der buss og båt møtast
- Tomta må visuelt knyttast saman med nordlige del av sentrum.
- Tomta må få ein klar eigar og eit vertsskap som er synleg på tomta heile året, alle dagar. Dette må ein spegle i storleik, innhald og kommande investeringar i bygg og anlegg.
- Gjestebrygga ligg mot fjorden. Os sentrum og folket som bur her er den viktigaste marknaden og vert ein viktig del av vise-vertskapet.
- Nye tiltak må vera små i skala og ta omsyn til opne siktliner og gateløp i heile Os sentrum.
- Nye bygg og tiltak må vera enkle. Reinhald og vedlikehald må vera ekstremt bra.
- Torgfunksjonen med torghandel bør utviklast saman med nye nordmenn, alle dagar er viktig.
- Viktige leverandørar til staden vil vera fiskarar, bønder, mattilverkarar/handverksbakarar, kreative handelsfolk og sosiale entreprenørar som lagar mat, musikk, liv og røre, festivalar og arrangement.
– Det handlar vel så mykje om å satsa på dei riktige folka.
– Begynn i det små. Overinvesterer vi får vi aldri det livet vi ønskjer, sa Frimann Hjeltnes som avslutta med ei oppmoding til osingane.
– Tru på deg sjølv - du er ein stolt person frå Os og Bjørnafjorden. Ver med, bruk og skap eit levande sentrum - ved sjøen.