Nærmaste brannmann sat i passasjersetet

Søndag klokka 12.48 kom det melding om brann i bil ved Os Seilforening si hamn i Kvernavika på Strøno.

Politi og brannvesen rykte ut, men gjorde fort retrett.

– Dei fekk sløkt brannen sjølv. Det var flinke folk om bord i bilen, fortel brannvesenet før retur til stasjonen på Moberg.

Otto, som gav seg som brannmann for fire år sidan, sat i passasjersetet på bilen som brann.

– Vi skulle ut og sjå om båten. På veg ned mot hamna kjente vi røyklukt, og så såg vi at det røykte mykje bak bilen.

Bilførar, som øvelseskøyrde, sløkte motoren og trilla ned mot hamna.

– Der er det vannslange. I tillegg kom ein kar springande frå båten med pulverapparat. Det var opne flammar, så vi brukte både vatn og pulver, fortel Otto.

Ingen av dei involverte blei røykskadd.

– I dag er brannvesenet flinke å verna seg, det prøvde vi òg å vera. Det var ikkje sånn før, du gjekk og hosta i dagesvis etter ein bilbrann, seier den avtroppa brannmannen og ristar på hovudet.