Nei, dette er ikkje Google Streetview
Men bilda til den nederlandske fotobilen blir nok likevel å finna på nett.
– Hadde eg fått hundre kroner kvar gong nokon spurde meg om det, så hadde eg ikkje trengt å kjøra bil, seier den engelsktalande føraren av fotobilen som i dag suser rundt i Os.
Dax Gray heiter han, og han jobbar for selskapet «CycloMedia: the specialist in large scale, systematic imaging of the environment».
– Google er konkurrenten vår, fortel Gray.
Tar bilde av heile Os
Gray reknar med å bruka to dagar i Os. Alle vegane i kommunen skal fotograferast.
– Kven er oppdragsgjevar?
– Vi sel bilda til kommunar. Vi har også avtale med Eniro.
På Gulesider.no finn du fleire gatebilde tatt av CycloMedia.
Gray er den einaste frå selskapet på fotooppdrag i Noreg for tida, og reknar med å bli verande i Skandinavia gjennom sommaren.