Nesten opprykk

Det blei ei nervepirrende avslutning på lag-NM i golf for juniorgutta frå Bjørnefjorden Golfklubb. Gutane speler i 2. divisjon, kor dei fire beste laga rykker opp.

Etter tre runder og totalt 600 slag på Mjøsen golfklubb i Moelv sto dei likt med laget frå Skjeberg GK.

- Begge laga hadde brukt 600 teljande slag på dei tre rundane, fortel nestleiar i Bjørnefjorden GK (BJGK) Harry Skage som var med til Austlandet.

Tredjemann blei avgjerande

Lag-NM blir avvikla med to lagrundar kor to spelarar frå same lag samarbeider om å spela (éi runde kor dei slår annakvart slag, og éi runde kor den beste skåren av dei to på laget på kvart hull tel) og éi individuell runde kor antal slag på dei tre beste på laget tel.

- Sidan vi sto likt med Skjeberg etter at skåra til dei tre beste på laget var talt opp, var det antal slag på fjerdemann som talte.

- Trur du ikkje det var likt der òg.

Slått med tre slag

Saman med lagleiaren på Skjeberg måtte han ta turen opp til dommarane for å få avgjersla på kven av dei to laga som fekk den siste opprykkplassen.

- Det viste seg at det då var skåren til den tredje beste på laget i den siste runda som avgjorde. Der var Skjeberg tre slag betre enn oss.

Skal vinna neste år

Umiddelbart blei dei fire BJGK-golferane Anders Engelsen (16), Stian Skage (17), Christian Blokhus (12) og Tord Åsnes (17) veldig skuffa over å missa opprykket med så liten margin.

- Etterkvart snudde skuffelsen til at det er betre å ta topp-plasseringa neste år, en å kjempa i botn av 1. divisjon.

- Vi har eit ungt lag (du kan vera til og med 19 år og spela junior-NM, journ.mrk), så med eitt år til på baken og god trening skal vi kjempa i toppen, slår Skage fast.

3 cm frå hole in one

BJGK stilte med to jamne lag i dei to lagkonkurransane med Blokhus/Engelsen på det eine laget og Skage/Åsnes på det andre.

- Vi var nær noko som kunne ha blitt ein golfsensasjon på den andre lagkonkurransen, fortel Skage.

På hol 1, eit par 3 hol, slo Anders Engelsen ut i ei perfekt boge mot holet. Ballen trilla og stoppa berre tre cm frå kanten av holet.

- Ein fantastisk prestasjon, og mindre fantastisk blei det ikkje då Stian slo omtrent like fantastisk ut i gruppa etterpå.

- Ballen til Stian stoppa berre 10 cm frå det same holet. Hadde dei to gått i hadde verkeleg fått noko å skriva om, avsluttar lagleiaren med eit smil.