Lokal | 13. juni 2013

Ni nye kunstnarar

Det er travle tider for kunstnar Arne Mæland med Os Skulptursymposium 2013 rett rundt hjørnet.

Ni nye kunstnarar
Arne Mæland med ein av skulpturane han laga medan han var i Italia siste gongen. (Foto: Kari Marie Austevoll Lyssand)
Kari M. Lyssandtorsdag 13. juni 2013 15:30

Det er no to år sidan forrige symposium som blir halde annakvart år på Os og 23. juni er dei i gong igjen.

Kunstnarane kjem frå fleire land, og Norge, Italia, Korea, Egypt og Syria er berre nokre av dei.

Mange vil vera med

- I år er det berre fire av dei som har vore med tidlegare, medan det kjem ni nye kunstnarar til bygda.

Å få kunstnarar til å bli med har ikkje vore noko problem for Mæland, ryktet om symposiet i Os har spredt seg.

- Det er veldig mange som vil vera med, så eg reiser rundt og møter dei forskjellige for å finna ut om dei passar inn i opplegget vårt.

- Dei er ofte idividualistar, medan eg er ute etter kunstnarar som er sosiale og kan utfylla kvarandre på ein god måte.

Knyttar venskapsband

Os kulturutvikling har arrangert Os Skulptursymposium annakvart år sidan 1999 og det heile byrja med då Mæland reiste til Cararra i Italia for å læra å arbeida med stein. Med god hjelp frå blant anna læremeisteren sin i Italia, Butros Romhein, vart Os Skulptursymposium ein realitet.

- Heilt sidan starten har skulptørane som har vore med på symposiumet budd hos vertsfamiliar i Os.

- Eg ønskjer ikkje at dei skal halda seg i ei gruppe for seg sjølv, men skapa venskapsband til familiane dei bur hos.

- I år er nokre av skulptørane tilbake til familien "sin" for tredje gongen.

Får oppleva mykje

Det er ikkje berre det å laga ein skulptur kunstnarane skal gjera medan dei er i Os. Mæland har fleire planar i løpet av tida dei er her.

- Vi skal på konsert på Lysøen og på cruise på Osøren blues og jazzfestival.

Den andre veka vil vera ope for meir spontane turar på fjorden, fisking og grilling, alt etter kva vêret tilseier.

- På cruiset vårt laurdag 29. juni er det ledige plassar for dei som ønskjer å bli med oss ut på fjorden.

- Laurdag 22. juni, dagen før symposiet startar, er det det årlege Haveselskapet i Solbakkestova, og der er alle hjartleg velkomne.

Haveselskapet er i regi av Solbakkestova og WT litteraturfestival og vil på dagtid vera tilrettelagt for familiar og det vil bli grilling og hageleikar for store og små. På kveldstid blir det kun for dei vaksne.

- Søndag 23. juni er det opning av symposiet i Solbakkestova, der vil både kunstnarar og kjøparar mingla saman.

Interessa er stor

Måndag set kunstnarane i gong arbeidet, og dei treng ikkje uroa seg for at kunsten deira ikkje vil bli selt.

- Lista med kjøparar er full, det er både nye og tidlegare kjøparar og dei kjem frå fleire stader, både frå Os, Austevoll og Sotra.

For dei som ønskjer seg ein liten skulptur til heimen så vil det søndag bli ei utstilling av småskulpturar i Oseana.

Ofte i Italia

Sidan i haust har Mæland tilbragt mykje tid i Cararra, Italia, der han mellom anna har laga ein skulptur til Selje kommune som er framme i Selje i dag.

- Skulpturen, som er av St. Sunniva, er eit resultat av ein konkurranse eg vann for nokre år sidan.

- Eg byrja å hogga den ut i haust, men forarbeidet tok lang tid.

Mæland fortel vidare at årsakene til at han reiser til Cararra for å arbeida med stein er fleire.

- I fjella i Cararra er du omgitt av marmor og alt ligg til rette for deg.

- Miljøet er også veldig spanande og området er heilt unikt når det gjeld marmor.

Framleis mykje å gjer

Etter at skulptursymposiet er over for denne gong så skulle ein tru at Mæland får tid til å slappa meir av. Men enda har han fleire jarn i elden.

- No held eg på med utsmykking av eit skip frå Forland Shipping og er blitt forespurt om å gjer ein jobb for DOFF shipping.

- Så eg blir ikkje arbeidsledig dette året iallefall, smiler Mæland.

Spennande? Vil du ha ukas høgdepunkt i innboksen?

Last ned Midtsiden-appen idag

No kan du følgja nyhende frå Os - rett i appen.

  • Gratis å lasta ned
  • Bli varsla straks noko skjer
  • Tilgjengeleg i App Store og Google Play Store
Last ned appen
For å få tilgang til alle sakene i appen må du vera abonnent.