Sverre Lunde Pedersen var suveren under NM på Leangen kunstisbane (arkivfoto: Andris Hamre)

NM-gull til Sverre

Sverre Lunde Pedersen forsvarte tittelen då han blei suveren noregsmeister på skøyter allround i helga.

Av: Andris Hamre

I helga blei NM allround arrangert på Leangen i Trondheim. Sverre Lunde Pedersen stilte som tittelforsvarar blant herrene og leverte igjen varene.

To gode løp laurdag, med 38,21 på 500 meter, berre slått av klubbkamerat Sindre Henriksen og førsteplass på 5000 meter med 6.45,38 gav eit godt utgangspunkt før søndagen.

Der klinka han igjen til og vann 1500 med 1.53,98, 76 hundredel framfor lagkamerat Sindre Henriksen. På 10 000 meteren var han suveren med tida 14.20.78, heile 13 sekund foran Thomas Henrik Søfteland.

– Vi fekk ikkje noko gratis, så det var brutalt, men formen var bra, så då gjekk det fint, seier Sverre Lunde Pedersen til BT.

Gler seg til EM

Til BT fortel Lunde Pedersen at sigeren i NM gir ein god følelse for resten av sesongen.

– Det gir ein veldig god følelse og gjer at eg føler ein tryggleik og sjølvtillit inn mot EM som blir neste løp etter nyttår. Det gler eg meg veldig til. Det blir gøy å gå foran fulle tribuner. Eg er i god form og satsar på å kjempe om medalje, seier Pedersen.

EM går i Heerenveen i Nederland 5.-8. januar

Fleire saker