To NM-gull til Sverre

I helga blei NM enkeltdistansar arrangert i Vikingskipet, der Lunde Pedersen i oktober sette ny banerekord.

Sjølv om han kjempar i verdstoppen, og har 9 NM-gull og i alt 20 NM-medaljar frå før, blir NM tatt på alvor.

– NM fungerer på mange måtar som ei oppkøyring til verdscupopninga, men er det første skikkelege løpet for sesongen, og når du først stiller, så går det litt prestisje i det.

– Spesielt på 1500 meter, der nivået på landslaget er så høgt, blir eg gira, seier Sverre til Midtsiden.

Sverre deltok på tre distansar og tok gull på 5000 meter og 1500 meter.

På 1000 meter blei det sølv bak Håvard Holmefjord Lorentzen. Lorentzen vann også 500-meteren.

Var sjuk i september

Sverre er framleis i Hamar, og skal på isen i morgon. Så blir det heim til Bergen og Os fram til avreise til Japan om ei veke.

Dei to første rundane i verdscupen går i Obihiro og Tomakomai, dei to neste i Polen og Nederland.

• Les òg: Tilbakeblikk, oppkøyring og Sverre-kalender

– Formen er ikkje heilt der den skal vera. Eg var litt sjuk i september, og hangla litt i etterkant. Derfor droppa eg også 10.000-meteren i NM.

– Eg er nøgd med 1500-meteren, men kjente på 5000 meter at eg har meir å gå på, seier Sverre to veker før første verdscup.

Siktar seg inn på VM

Det er VM enkeltdistansar i Inzell i februar og VM allround i Calgary i mars som er dei store måla for sesongen.

• Les òg: Os Travel og Midtsiden arrangerer Sverre-tur til Inzell

– Det er veldig kjekt at det kjem osingar til verdscupen! Inzell er ein veldig koseleg landsby, synest Sverre.