No startar skisesongen

Regn og vind tok i slutten av november med seg mykje av snøen, men no er det tid for opning ved eit av alpinanlegga nær Os.

Kjetil Vasby Bruarøytirsdag 01. des. 2009 22:47

Eikedalen har 5 cm snø og Voss Resort har 10 cm snø. Eikedalen skriv på sine heimesider at dei satsar på opning første halvdel av desember, Voss Resort håpar på første helga i desember, men må truleg venta litt til.

Alpinanlegget som er først ute er ikkje uventa snørike Voss Fjellandsby i Myrkdalen.

Dei melder om 60-90 cm snø på toppane, og dersom vêret held seg kaldt vil dei opna skitrekka i Vetlebotn helga som kjem, 5. - 6. desember.

Yr melder minusgradar i Myrkdalen kvar dag framover, snø på fredag og snø på sundag.

Med ny 6-seters ekspressheis, flere andre nye heisar og trasear og dobla parkeringskapasitet fekk Voss Fjellandsby ei auke på 83 prosent frå 2008 til 2009-vinteren. Før årets sesong har de førebudd terrenget godt.

- Vi har jobba med terrenget og snøproduksjonsanlegget for å få best mogleg forhold så tidleg som mogleg, seier Per Berge.

Nytt i år blir skicrossløyper, éi frå Expressen og den andre mot Helgatun. I tillegg blir parken flytta og bygd opp på ny.

- Skiparken blir flytta frå Kari Traa-trekket til et område ved Helgatun der dei leikne får meir plass for seg sjølv.

Delar av parken blir montert i eit snørikt område ved Expressen, for en lang sesong for kjøring på rails og hopp.

Myrkdalen Hotell er i ferd med å koma for sal. Til saman 7000 kvadratmeter skal husa 83 leilegheiter frå 29 til over 100 kvadratmeter. I 1. og 2. etasje blir det blant anna resepsjon, konferanserom og restaurant.

- Vi treng auka kapasitet på varme senger, vi har ikkje nok å leiga ut, og håpar at kjøparane i hotellet vil benytta seg av våre utleigetenester når dei ikkje brukar husværet sjølv, seier Berge.