Nøgd før første dag

Bildeserie:

1 av 6

Byggearbeidet har vore heilt i rute med nye Espira Ulvevatnet barnehage i Kolskogheiane i Os. Like ved ligg den ganske nye "søsterbarnehagen" Kuventræ, begge er eigd av Barnebygg, som nyleg har skifta namn til Espira.

- Når vi har kome eit stykke ut i august har vi rundt 100 ungar her. Då har vi nokre få plassar ledige. På opningsdagen måndag ventar vi 35 ungar, seier styrar Therese Dahn.

Therese er utdanna førskulelærar og har bakgrunn som leiar for skulefritidsordning og styrar i Espira Helldal barnehage. Ho bur på Kyrkjebyrkjeland med mann og tre ungar.

Mykje friluftsliv
Barnehagen får fem basar. I tillegg skal dei ha ei eigen utegruppe med deltakarar frå alle dei fem basane.

- Alle får vera mykje ute, men denne gruppa kjem til å ha nokre litt meir omfattande ekspedisjonar. Ungar frå tre år og opp kan vera med, og vi vil at flest mogleg skal få dette tilbodet, så utegruppa får ulike deltakarar frå dag til dag, seier Therese.

Torsdag kveld var det foreldremøte i barnehagen, og rundt 150 møtte fram. Utegruppa var blant det foreldra viste stor interesse for.

Tre menn i staben
Styraren fortel om stor og god søkarmasse til stillingane, og er spesielt glad for at ho har fått heile tre menn i staben.

- Dette med menn er Espira veldig fokusert på, både å få dei til å søkja jobb hos oss, og på å få dei til å bli verande. Vi lèt menn vera menn, og lagar oppgåver som dei liker, og har nokre av dei vera med i utegruppa.

- Menn og kvinner er forskjellige, derfor er det ein fordel å la ungane få menn blant dei vaksne i barnehagen. Menn er ofte sterke, litt barsnelege og leikar på ein annan måte enn vi damer. Det er ikkje rart at dei er populære som "barnehageonklar", seier Therese Dahn.