Norsk rock på Bar2Be

Det blir musikk av Jokke, DumDum Boys og Raga Rockers når «Verdiløse Menn» i kveld speler på Os for første gong.

Kjetil Vasby Bruarøyfredag 18. feb. 2011 10:42

Halve «Riff Raff», det populære AC/DC-tributebandet frå Os, er representert i «Verdiløse Menn». «Verdiløse Menn» (namnet på ei Jokke og The Tourettes-låt) var også eit tributeband i starten, for om lag eit år sidan, men no har dei gjort plass til norsk rock frå andre artistar.

- Vi starta som eit tributeband for Jokke og Valentinerne, men speler no også musikk av blant andre Raga Rockers og DumDum Boys, seier Jan Atle «Padden» Åserød.

«Padden» speler bass med Riff Raff, men sit bak trommene med Verdiløse Menn. Med seg har han Riff Raff-kollega Heine Salbu på gitar, Jan-Ove Hansen på bass og vokalist og gitarist Sven-Erik «Svenna» Gabrielsen.

- Det har blitt nokre spelejobbar på oss dette året, blant anna på MC-treff og på pub på Dale for ikkje så lenge sidan. Det blei bra guff på Dale, no gler vi oss til å spela på Os for første gong, seier Åserød om kveldens konsert på Bar2Be.