midtsiden

Ny allianse

Os og krinsane har samla dei største fotballtalenta i kommunen til det som kan bli eit superlag med 13- og 14-åringar.

image
image
image
Av: Kjetil Vasby Bruarøy

Sundag har Os-alliansen, som har vore arbeidstittelen på den nye gruppa med fotballtalent, si femte samling av rundt 30 spelarar fødd i 1995 og 1996.

- Vi har hatt talentsamlingar før, men aldri så systematisk som no. Vi har heller ikkje hatt ei slik gulrot tidlegare, seier talentutviklar i Os Turn Fotball, Roald Stigen.

A-lagsspelarar som Ramo Racic, Dani Bergstø og Vegard Leikvoll Moberg er talent som har vore med på slike samlingar tidlegare. Forskjellen no er at krinsane er meir involvert og at frekvensen på samlingane er høgare.

Inspirerande draktfarge
Det var Einar Nytræ som kom med allianse-namnet, frå noko som blei prøvd i Oslo for nokre år sidan. Det var vellukka på fleire måtar, ikkje minst med tanke på sponsormidlar, ein halv million kom inn til talenta i hovudstaden.

- Vi har ikkje håp om liknande summar, men Leif Bjarne Bøyums minnefond har gjeve 15.000 kroner i støtte til utstyr til talentgruppa.

- Før vi bestilte drakter spurde vi ordførar og kultursjef om det var greit å ha Os Inspirerer-oransje farge på desse, og det syntes dei var stas, fortel Stigen.

- Haldning viktig i uttaket
Bjørn Mjelva frå fotballgruppa på Søfteland var ein av dei som tidleg var i dialog med Roald Stigen om å danna talentgruppe.

- Vi har samarbeid med Kaland når vi kjem til 11-ar-fotball, og har spelarar frå både Søfteland og Kaland med til alliansen. Når vi tar ut spelarar frå laget er haldning og oppmøte på trening dei viktigaste kriteria, så kjem ferdigheiter, seier Mjelva.

- Litt av poenget med å ha ei slik samling er at vi skal ha topp motiverte utøvarar å jobba med, spelarar vi kan venta oss mykje av i ei gruppe der det er kamp om plassen.

Odd Jarle Hjelle frå Nore Neset er også sentral i treninga av talenta, medan Cato Moldskred frå Søre Neset blir hovudtrenar.

- 95-årgangen er svært god i Os, og med dette samarbeidet kan vi stilla til kamp med eit lag på høgde med kva klubb som helst, seier Mjelva.

Samlar saman til superlag
Noko av det som er nytt er at talenta på sikt skal danna eit allianselag som kan gjera det skarpt i cupar rundt om i fylket, og kanskje utanfor Hordaland.

- Sundag har vi vår femte samling, og vi kjem nok til å stilla lag i ein cup allereie no til hausten.

- Vi var 28 spelarar på førre samling, og kjem nok til å redusera ned til ein stall på rundt 18, fortel Stigen.

Då blir det nok flest av dei yngste talenta som må vika, men desse står då igjen som godt førebudd på plass på laget til neste år.

Fleire saker