Ny forsvarssiger
Osdamene sette eit knallhardt forsvar frå start og punkterte kampen i løpet av førsteomgangen med 19-10 til pause.

Handballdamene har ei tøff helg med kamp både laurdag og sundag. I tillegg speler andrelaget kamp på måndag.
- Det er eit tett program. Difor var det greit å få kvila nokre av spelarane utover i kampen mot Årstad i dag, fortel trenar Torbjørn Bøthun.
Når Bøthun disponerer ein spelarstall som han no gjer er det ikkje grunn til uro. Spelarane som kjem inn for førsteseksaren tek oppgåva med glans og leverer varene prikkfritt.
Satte forsvaret
Grunnlaget for laurdagens 34-25 siger over Årstad la Os i forsvarsarbeidet.
- Vi skulle vera aggressive og offensive i forsvar.
- Det tykkjer eg jentene klarte. Vi blokkerte skot og hindra innspel heile vegen. I dag er eg nøgd med innsatsen, slår Bøthun fast.
Med 19-10 og full kontroll til pause blei det aldri ein spennande kamp og dei omlag 90 tilskodarane på tribuna fekk aldri særleg puls.
Os - Årstad 34-25 (19-10)
Utv: Os 1x2 min, Årstad ingen
Os sitt lag: Irene Tangerås 6, Marte Haugsdal 1, Anna Bjørke Kallestad 10, Tonje Hjertnes 3, Emilie Hjertnes 1, Maria Stangeland Lunde 2, Marte Øvreeide 5, Line Hjelle Berentsen, Vibeke Ingebrigtsen, Elise Hjelle 1, Vilde Djupvik Fyllingen 4, Vilde Brattabø 1.
Treng hjelp frå tribunen
Os ligg etter sigeren mot Årstad på andreplass bak Jotun. Sundag venter toppoppgjer mot tabelltrear Kjøkkelvik, som ligg likt på poeng med Os, men med ein kamp meir spelt.
- Kampen mot Kjøkkelvik blir tøff. Kampane mot dei pleier å bli jamne.
- I tillegg har dei forsterka laget framfor denne sesongen, så vi må spela opp mot vårt beste i morgon.
- Sundag klokka 19.30 treng vi all den hjelpa vi kan få, så eg oppmodar handballinteresserte osingar til å ta turen i hallen, avsluttar Torbjørn Bøthun.