Ny jamn kamp av Os 2

Medan Os slo Austevoll 5-1 og Lysekloster tok ein suveren 8-0-siger over Hundvåg, blei det stort sett tap til dei andre herrelaga i Os.

I 6. divisjon tapte Nore Neset 2-0 for Viggo på bortebane og Søre Neset 1-2 for NHH 3 på heimebane.

Søfteland held fram sigersrekka og leiar framleis tabellen etter 3-1 over Samnager laurdag.

Andrelaga tapte

Lysekloster 2 i 5. divisjon og Os 2 i 4. divisjon spelte bortekampar søndag.

Lysekloster 2 tapte heile 9-2 for Halsnøy, Os 2 gjekk på eit knepent 3-2-tap for Sandviken.

– Mange jamne

Terje Kvittingen fortel om nok ein jamn kamp for Os-rekruttane.

– Dessverre har det blitt uavgjort og tap i desse jamne kampane, seier han.

Os 2 har 1 siger, 2 uavgjorte og 4 tap på dei første 7 kampane.

Flotte mål

I dag låg dei under 2-0 til pause før Ørjan Glesnes reduserte i 56. minutt og Espen Borgen sette inn 3-2 direkte frå cornermerket før slutt.

– Espen har litt lik fot som storebror Preben og lagkamerat Tor Erik Borgen, det var ei fantastisk skåring både av Ørjan og Espen i dag.

Trur det vil snu

– No har vi litt folk ute med skade og stiller med talentfulle, men unge og lette spelarar. Når vi får tilbake spelarar som Ramo Racic, Dani Bergstø og Vegard Engelsen Moberg, som er ute med skade, får vi nok den rutina som skal til for at det blir stang inn og ikkje stang ut, trur Kvittingen.

Han fortel om ein kanonade mot Sandviken-målet siste kvarteret, der blant andre Aksel Skaar heada i tverrliggar.

– Kampen var jamn, begge lag hadde perdioar dei styrte kampen. Men når vi får litt meir rutine, og meir rutinerte spelarar tilbake, trur eg dette vil snu.

– Ørjan Håland leiar spelarane på ein veldig fin måte og 4. divisjon er ein god utviklingsarena for dei mange talenta våre.

Os 2: Frode Øvredal, Tor Erik Kjosås Berge, Børge Borgen, Steffen Ludvigsen, Mathias Lunde Rød, Stian Bakke, Adrian Valle, Sander Kvittingen, Ørjan Glesnes, Mats Lepsøe, John Ole Johannessen.

Innbytarar med speletid: Thomas Mjelva, Espen Borgen og Aksel Skaar.

Neste kamp for A-laget er borte mot Hundvåg laurdag, neste kamp for Os 2 er heime mot Odda, som ligg på 3. plass, søndag om ei veke (kl 16).

Sjå tabell.