Ny pris: 27,4 milliardar

Då ferjefri E39 blei lansert for to år sidan var prislappen frå Kristiansand til Trondheim på 150 milliardar kroner, og ein trudde at prislappen på Hordfast frå Aksdal til Bergen ville bli på mellom 9 og 13 milliardar. Nye tal frå Statens vegvesen syner at prisen for heile strekninga no har kome opp i 268 milliardar.

Tala kjem fram i Riksvegutredninga 2015, ein rapport kor Statens Vegvesen tek for seg og analyserer dei framtidige behova fram mot 2050. Utgreiinga er ein del av grunnlaget for den komande nasjonale transportplanen (NTP) (2018-2027).

Treng 30 milliardar i Os-området

I utgreiinga har vegvesenet sett på kva investeringsbehov ein ser for seg fram mot 2050. Rute 4A omhandlar strekket frå Stavanger - Bergen - Ålesund.

Delar av strekka omfattar Os, frå tabellen i rapporten kan ein lesa at vegvesenet ser for seg å investera vel 30 milliardar på riksvegane mellom Stord og Rådal.

• Ådland (Stord) - Svegatjørn (Os), ny firefeltsveg i ny trasé: 27,4 milliardar
• Sykkelveg med fortau, Os: 800 millionar
• Svegatjørn - Rådal, ny firefeltsveg i ny trasé: 2,6 milliardar.

Planprogram i april

Planprogrammet med anbefalingar om kva traséalternativ som skal utgreiiast vidare skal etter planen blir lagt ut på høyring no i april.

Men allereie no veit ein at kombinasjonen av vatndybde på opptil 550 meter og ei totallengde på omlag fem kilometer gjer det umogleg med konvensjonelle brutyper over Bjørnafjorden.

– Det er kun flytebru og neddykkede rørbru som er aktuelle når ein skal laga ein vegforbindelse over ein så brei fjord, seier prosjektleiar Mathias Eidem, i Statens vegvesen til TU.no.

Eidem fortel at prosjekteringsarbeidet er i full gang.

– Dei tre arbeidgruppane prosjekterar heilt ulike løysinger. Vi har ikkje beslutta når vi skal avgjera kva type teknologi vi kjem til å velgja, men gler oss til å sjå dei endelege resultata.

Endleg planforslag med tilrådd traséval skal vera klar til høyring våren 2016.