Bildeserie:
Det starta med at SK Sotra, saman med Heilt Konge AS, supplerte «Straumedagane 2011» med eigen bilmesse. I 2014 sto fotballhallen ferdig, og messa blei utvida, i 2016 vaks messa seg større og messa blei utvida inn i den doble handballhallen Sotra Arena.
– Publikumsmengda auka frå 7000 til nesten 10.000 frå 2015 til 2016. I år hadde vi mål om å passera 11.000, og auka til heile 12.097 gjestar, seier dagleg leiar i SK Sotra, Dan Christensen til Midtsiden søndag kveld.
Internasjonal merksemd
20 utstillarar var på plass med stor utstilling innandørs og over 100 bilar til demokøyring utandørs. Like viktig var utvalet bilar dei hadde med seg.
– Vi er takksame for den gode oppslutnaden om messa, at forhandlarane i bergensområdet både samlar seg om å laga denne store marknadsplassen - og at dei strekk seg så langt dei klarer for å få med det siste nye til utstillinga si.
På messa var det ei rekke avdukingar, førpremierar, noregspremierar - til og med europapremiere på enkelte modellar.
– Det blir eit visst internasjonalt sus over det når eit pressekorps på 40 journalistar kjem til Sotra for å sjå siste nytt i Europa, seier Christensen nøgd.
«For de av oss som er i Berlin og Barcelona annenhver dag for å se på en ny bil, er det lett å blåse av en såkalt bilutstilling arrangert i provinsen. Jeg mener, skikkelig på landet» skriv Bilnorge.no om messa.
Straumlinja trafikk på Straume
Straume Idrettspark, med Sotra Arena, har vakse opp på få år. Veksta har ikkje stoppa opp, no durar SK Sotra vidare, med solid økonomisk støtte frå Trond Mohn, og investerer ytterlegare 93 millionar kroner i ein turnhall med bruttoareal på 3.200 kvadratmeter.
SK Sotra har totalt 2800 medlemmar innan ulike idrettar. Etter at Sotra Turn blei del av SK Sotra utgjer turn nesten 1/3 av medlemsmassen.
– Når turnhallen står ferdig får vi fleire parkeringsplassar enn i dag, men i byggeperioden mister vi nokre plassar, derfor hadde vi ekstra glede av Kystbygarasjen og bussar i skytteltrafikk i år. Dette fekk folk heldigvis med seg, med over 4000 gjestar per dag laurdag og søndag var dette med logistikk viktig for oss.
1. til 4. februar 2018 er det tid for båtmessa Dra til Sjøs i Sotra Arena.