Ny treningsform slår godt an

I fjor markerte Susan Askvik 10 år og 800 timar med zumba i Symrasalen i Nore Neset Aktivitetshus.

Same år skulle ein heilt annan form for trening, også denne forma av teamet bak Zumba-varemerket, sjå dagens lys.

– Treningsformen heitte først «Strong by Zumba», men for å unngå misforståing blei den døypt om til «Strong Nation», fortel Marianne Lyssand Hodneland.

Ho tok utdanninga i London og sat klar med nytrykte flygeblad 11. mars i fjor. Du hugsar kanskje kva som skjedde dagen etter?

– Heldigvis opna det for at eg fekk tatt nokre økter på sommaren i fjor, vi fekk åtte rundar i Vargasalen i Oseana. Men det er først sommaren i år at eg kom i gang med fast timeplan, fortel Marianne.

Drop in

Kvar måndag køyrer ho no «Strong Nation» i Symrasalen. Utan medlemsskap eller klippekort, berre drop in betaling.

– Folk deltar når det passar, men eg ser at fleire går meir eller mindre fast. Foreløpig er det jo berre denne eine dagen i veka.

Då vi var innom i går var det rundt 15 i salen, minst tre av dei er hannkjønn.

– Det har tatt seg litt opp. Eg har laga ei eiga facebookgruppe, men foreløpig ser det ut som om mesteparten kjem fordi ein ven eller nabo har anbefalt det.

Frå før har Marianne erfaring som tabata-instruktør i Vognhallen, men «Strong Nation» er ikkje kopla til Herbalife på noko vis, og det er verken smaksprøvar eller sjanse å få kjøpa seg ein shake før eller etter trening.

– Det stemmer. Dette er berre trening, folk må ta med flaske og drikke sjølv! understreker instruktøren.

– Berre éin ting som får meg like raud i kjakane

Treningsformen liknar verken på zumba eller aerobic, anna enn at den går etter musikk, utan utstyr.

Rørslene er inspirerte av blant anna kampsport og styrke med kettle bell. «Dra!» «Slå!» roper Marianne.

– Det er eit fantastisk driv, eg har ikkje vore så raudsprengt etter trening sidan eg dreiv aktivt som konkurranseutøvar i karate, seier Rebekka Bruarøy Hamilton.

Sonja Vernøy Hansen og Wenche Røttingen Valen er einig, men gir så vidt Midtsiden løyve til å ta bilde på tampen av økta.

– Eg er ikkje flink til å koma meg ut på joggetur, så dette er midt i blinken Her får eg både kondisjon og styrke. Marianne er kjempeflink til å få oss til å ta i.

Sjølv seier Hodneland at ho får god hjelp av materiellet ho får frå Zumba-organisasjonen.

– Eg betaler jo lisens for å driva med dette, og inkludert i dette er nye øvingar og ny musikk.

– Musikken er skreddarsydd til programmet, og varierer i intensitet på ein måte som gjer at både eg og deltakarane omtrent blir lokka til å pressa oss, forklarer Marianne.