Ny venstreback på Lysekloster

Eirik Rode har signert for Lysekloster. Rode hadde 54 kampar for Årdal før han i fjor gjekk til Lyngbø, men er ein spelar som har vore i Lysekloster sin kikkert ei stund.

– Vi hadde dialog med han i fjor vinter òg. Etter førre sesong tok vi opp igjen kontakten, og no har han trent med oss sidan 4. januar, seier Lysekloster-trenar Ruben Hetlevik.

Han ser på Rode som ein klok og rask spelar med ein spesielt god venstrefot.

– Eirik kan brukast på kant, men vi har primært tenkt at han skal konkurrera om plass som venstreback. Frå før har vi berre Sigve Rørstad i denne posisjonen.

Os-back Knut Spangelo Haga har vore på prøvespel med Lysekloster.

– Han har vore i fleire klubbar i vinter, og vi veit ikkje kvar han landar, seier Hetlevik.

Kan signera to til innan kort tid

Frå før har Lysekloster sikra seg tre nye spelarar etter 2017-sesongen, Rune Åsheim Mo (Nest-Sotra), André Pouca Roupa de Matos (Øystese) og Mats Walberg (Tvøroyrar Bóltfelag, Nest-Sotra, Fana).

– Vi har fleire på gang, og det er no tilbod ute til to av dei vi har hatt på prøvespel.

– Eg håper vi landar begge før første treningskamp denne vinteren.

Treningskamp og seriestart mot Varegg

Første av vinterens treningskampar blir mot Varegg og blir spelt i Vestlandshallen søndag 4. februar.

Då kan det, for Lysekloster sin del, bli gjensyn med tidlegare lagkamerat Joachim Bjånesøy, som er på prøvespel hos Varegg.

Varegg er òg Lysekloster sin motstandar i serieopninga, som er i Lysefjorden laurdag 14. april.

• Terminliste for 3. divisjon avdeling 4

• Midtsiden samleside: Lysekloster fotball