Ny video frå Håland

Bildeserie:

1 av 1

Etter filmstudie tok Ørjan Håland på seg oppdraget med å laga musikkvideo for Os-gruppa Manheads. I går blei hans andre musikkvideoproduksjon publisert.

- Vokalisten i Babe Rawlins jobbar med kameraten min Espen Kolås, og slik fekk dei veta kven som hadde laga Manheads-videoen. Så kom dei og spurte om eg ville ta produksjonen av video til Strawberries and Whipped Cream, fortel Håland.

Den tidlegare Os-spelaren jobbar i medieavdelinga til Sportsklubben Brann, men tar av og til nokre filmoppdrag utanom.

Ny nominasjon
Babe Rawlins, som blant anna har to medlemmar frå Fusa, har verkeleg blitt latt merke til. Strawberries and Whipped Cream har gått sin sigersgang på P3 og nyleg blei dei nominert til å spela LIVE for det som truleg blir 1,3 millionar TV-sjåarar under NRK sin tv-aksjon.

- Dei gjorde som 150 andre, lagde eigen låt med passande tema til aksjonen, og blei saman med fire andre nominert. Eg forsto det slik at dei også fekk veldig fine tilbakemeldingar frå juryen, seier videoprodusenten.

Vil du høyra bidraget - og stemma det fram i konkurransen, kan du sjå NRK Urørt.

Grisemaske og Canon
Babe Rawlins-videoen er som Manheads sin Demonizer produsert med eitt kamera.

- Eg skaut heile videoen med eit Canon 5D, speilrefleks fotoapparat med digitalvideo-opptakar.

Budsjettet var på 150 kroner.

- Pengane gjekk med til å kjøpa ei grisemaske, ler Ørjan.

Her kan du sjå musikkvideoen til Strawberries and Whipped Cream.