– Nydeleg ake-vêr!
Det er ikkje berre dei aller yngste som er glad for at vinteren har kome.
Dei som hadde planar om ein tur i akebakken søndag blei nok litt skuffa, snøen som kom i natt var så våt at vi hadde same snødjupne i dag som laurdag.
Men det var likevel god vinteraktivitet fleire stadar i Os, blant anna i Elvebakken mellom Os sentrum og Flåten.
– Vi avtalte det på skulen på fredag. Eg inviterte på aking, graut og kakao, fortel Thea Hove Hauge.
Ho og fire venninner frå 10. klasse ved Os ungdomsskule var i full sving i akebakken frå 13-tida søndag.
Innimellom fekk akebretta kvila - då var det fram med kamera og ta litt bilde av kvarandre.
– Men no skal vi snart heim og eta. Og så skal vi sjå "Love Actually", fortalte dei fem.
Saman med andre akeglade osingar kan dei sjå fram til gode forhold ut veka;
både Yr og Storm melder ei veke med minusgradar og lettskya vêr.