Nytt idrettstilbod ved Os vgs

– Vi ser at vi har mange aktive idrettsutøvarar blant elevane våre, og ønskjer at det skal bli lettare for desse å halda fram med utvklinga si samtidig som dei tar utdanning, seier rektor Johan Henrik Lassen.

Idrettsutøvarar som Joakim Sælen (kappgang), Marco Matre (motocross) og verdsmeister i boksing, Ceclilia Brækhus, har vore elevar ved Os vgs.

– Seinast no nyleg var det ei handfull elevar som søkte nokre dagar fri for å reisa med Os Fotball på treningsleir på Kypros. Vi ønskjer no å legga endå betre til rette for fysisk aktivitet, både for konkurranseutøvarar og for andre som er glade i trening.

Fem timar ekstra i veka

Det er knytt ein eigenandel til tilbodet, som òg inkluderer tilgang på helsestudio. For deltakarane blir det ein noko tidlegare start på skuledagen.

– Det blir fem timar med idrett ved sidan av gymtimane. Nokre dagar er det trening om morgonen, men vi har òg to timar trening om fredagen, seier lærer Karl Atle «Kalle» Pedersen.

• Les òg: Flyttar inn i ny verkstad til 30 mill

Elevane vil få generell styrke- og kondisjonstrening ved sidan av å prøva ut ulike breiddeidrettar. Følgjer dei eit opplegg frå eigen idrett kan det bli tilpassa så dei kan få nokre økter individuelt.

– Vi har eit enormt utval av fasilitetar i gåavstand frå skulen, med Os Roklubb, Osbadet, Actic treningssenter, idrettshall som snart blir supplert med ny dobbelthall, fotballbanar og fin natur. Det er til og med skytebanar i nærleiken, om det ein dag blir aktuelt å undersøka sjansen for tilgang på desse.

Gjeld to studieretningar

Det er førebels ikkje tilsett nokon til å leia den komande elevmassen som vil ha utvida treningstilbod i skuletida.

– Vi har ein del kompetanse frå før, både innan idrett generelt og innan idrettar som roing, fotball og motocross.

• Videoreportasje: Tiandeklassingar frå Nore Neset besøkte Os vgs

– Tilbodet gjeld førebels elevar på VG1 TIP og VG1 bygg- og anleggsteknikk, og vi vil tilpassa oss etter søkarane.

Søknadsfrist er 23. april, ei god stund etter fristen for å søka studieplass (1. mars).