Nytt syn på nattklubb?

I dag skal administrasjonen i Os kommune skriva si innstilling i klagesaka på godkjenning av nattklubben Irish Cat. Saka skal opp i plan- og bygningsutvalet torsdag 22. november.

Klagar er spent på om administrasjonen kjem med ei innstilling som fører kommunen ut på tynn is.

Les òg: Fleirstemt klage på vedtak

Kva politikarane vedtar er han ikkje så spent på, dei er folkevalte lekfolk. Administrasjonen har han høgare forventningar til.

– Om administrasjonen held fram med å føreslå godkjenning er det truleg ulovleg og noko som kan gje oss sterke kort ved ei eventuell framtidig rettsak, åtvarar konsulent Terje Haugan på vegne av klagar, Oshjørnet AS.

Hovudårsaka til at ei positiv innstilling til nattklubb kan, ifølgje Haugan, vera ulovleg er at den er ei ubegrunna endring i haldning til saka:

• Administrasjonen ved rådmannen var nemleg imot nattklubb då Opus søkte i 2007, grunna klage på støy frå naboar og negativ innstilling frå lensmannskontoret.

• Kommunen ved rådmannen rådde også negativt til godkjenning av nattklubb då Irish Cat søkte i 2010.

Fleire hus, men positiv til nattklubb

Sjølv om rådmannen rådde frå godkjenning stemte fleirtalet for å gje Irish Cat gjennomslag for nattklubb i 2010. Men i sommar måtte dei søkja igjen.

I august 2012 skriv kommunalsjef Karl Ole Midtbø at administrasjonen er positiv til nattklubbdrift; "Ulempene for naboar og gjenbuarar er ikkje meir enn kva ein kan forvente i eit sentrumsområde."

– Administrasjonen ved rådmann har rådd frå nattklubb desse åra, men no kjem kommunalsjef Karl Ole Midtbø og seier det er pårekneleg med støy i sentrum? Når sjefen hans, rådmannen, i alle år har vore negativ til nattklubb i dette området. Kvifor har administrasjonen snudd? Dei har ikkje lov å snu utan god og begrunna årsak.

– Det einaste vilkåret som er endra sidan 2010, som vi ser, er at kommunen i mellomtida har godkjent endå fleire bustadar i og rundt Os sentrum, blant anna omregulering av nettopp Oshjørnet.

– I tillegg er lovverket skjerpa, spesielt når det kjem til omgrepet nattklubb.

Pårekneleg med støy i sentrum?

Ved årsskiftet 2010-2011 gjekk Opus sin leigekontrakt i Oshjørnet ut. Oshjørnet AS ville, grunna belastningen nattklubben hadde på eigedomen og naboar, ikkje fornya avtalen.

– Vi meinte signala var klare, sentrum er regulert for bustadar, forretningar og kontor - og administrasjonen hadde vore imot søknadar om nattklubb grunna klage på støy frå naboar i Os sentrum og i Finnebrekka.

– Etter dette har nattklubben og huseigar blitt boren på gullstol og mykje av det som har blitt sagt frå administrasjonen har vore feil: Vi fekk beskjed om at lokalet var godkjent for minst 200 personar, noko som var feil, vi fekk beskjed om at tiltaket ikkje var søknadspliktig, noko som også var feil.

Haugan seier han også har fått beskjed om at det er etablert praksis å gje løyve til nattklubbar i Os sentrum.

– Det stemmer heller ikkje. Verken Opus eller Bar2Be er godkjent som nattklubb. Alle andre har måtta søkja om løyve, slik lova krever, om dei for eksempel skal driva frisørsalong der det har vore butikk eller renseri. Nattklubbane har fått utvida skjenkeløyve utan ein gong å ha søkt om bruksendring frå restaurant til nattklubb.

Fekk ikkje sjå rapporten

Haugan reagerer også på at han ikkje fekk tilgang på støyrapporten, som var klar 5. september.

– Den blei først lagt i postmappa 24. oktober - ei god stund etter at klagefristen vår gjekk ut.

– Det har vore både tungt og spesielt å jobba med denne saka, å måtta etterprøva alt vi har blitt fortalt, og ofte oppdaga at det vi har blitt fortalt har vore feil. Andre stadar er det kommunen som ser at utbyggar gjer jobben sin, her føler eg at det har vore motsett.

– Ei komplisert sak

Store delar av leiinga i Os kommune er på budsjettkonferanse på Stord, og vi har ikkje fått tak i kommunalsjef Karl Ole Midtbø for kommentar.

– Eg har spesifisert at denne saka skal brukast tid på og behandlast formelt og korrekt frå vår side før den blir levert vidare til politikarane, seier rådmann Knut Terje Rekve på telefon frå Stord.

Så viser han vidare til Geir Heldal, avdelingsleiar for bygge- og forvaltningssaker.

– Dette er truleg den mest kompliserte saka vi har behandla i mi tid i Os kommune.

– Vår saksbehandlar sit med saka og blir nok sitjande utover ettermiddagen. Så vil vi gå igjennom saka med Midtbø når han er tilbake på torsdag, seier Heldal, som førebels ikkje kan seia kva innstillinga blir.

– Kunne vore stoppa

Haugan presiserer at han ikkje er imot nattklubb.

– Sånn det er no står dei med valet; hus eller fest, uvikling eller uteliv. Hadde dei hatt ein plan så kunne dei nok fått til begge delar.

Han meiner også at verken Irish Cat eller politikarane har gjort noko gale.

– Saka kunne vore stoppa hausten 2010, då Irish Cat fekk skjenkeløyve utan å ha bruksløyve. Hadde administrasjonen sett då, det dei etter lang tid endeleg såg våren 2012, at etableringa var søknandspliktig - og det vi argumenterer med i vår klage; at reguleringsplanen ikkje inkluderer nattklubb, så hadde vi ikkje stått oppi denne saka.

– No er prosjektet vårt på Oshjørnet skrinlagt, det som skulle vera starten på ei utvikling av Os sentrum til 150-200 millionar kroner. I den andre enden står Irish Cat med uvisse og risiko for å bli stengt etter store investeringar på ombygging.

– Om innstillinga frå administrasjonen er positiv og politikarane avviser klagen, kva då?

– Om innstillinga frå administrasjonen er positiv eller negativ har mest å seia for dei sjølv, ved vidare saksgang. Det som er viktig er at politikarane får ei fagleg begrunna innstilling.

– Om politikarane avviser klagen så blir dei to klagarane, frå Oshjørnet ved advokat Falnes og Brugata og Buggegården ved underteikna, tatt vidare til fylkesmannen.

Parallelt med desse sakene har Oshjørnet ein naboskjønn-sak som først var retta mot Sweco som var ansvarleg søkjar for Irish Cat. Men Sweco har avvist at dei er tiltakshavar og det er førebels uavklart kven som blir motpart, Irish Cat eller huseigar Anders Fagerthun.

– Oshjørnet AS med eigarar har tapt mykje pengar på denne saka. Uavhengig av vidare utfall så er det naturleg at dei vil ha dette dekka, seier konsulent Terje Haugan.