Nytt vårslepp i Os
Laurdag 28. april er det tid for årets vårslepp i Os sentrum. Vassjetkjøring, skating, dykking i tank og båttur med Elias er blant det som står på programmet.
– Vi har vore heldige og fått med fleire maritime deltakarar på årets vårslepp, seier leiar i Os Sentrumsforening, Geir Amundsen.
Vårsleppet blei første praktiske publikumsretta oppgåve for sentrumssjefen som starta i den nye jobben 1. februar i år.
– Takka vera entusiastiske butikkdrivarar og veldig samarbeidsvillige representantar for lag og organisasjonar har det gått veldig fint. Eg synes vi får ei fin samansetjing av aktivitetar og utstillarar på vårsleppet.
Båt, vassjet og dykking
Store delar av årets vårslepp blir av maritim karakter. I år er vassjetkjørarane tilbake i hamna, i tillegg har ein av utstillarane med seg vassjet for sal.
– Båtens Beste kjem også og har med seg Askeladden-utstilling. For dei yngste kan vi by på båtturar med Redningsselskapet sin kjente helt; Elias.
Os Dykkerklubb stiller ut saman med kurssenteret og dykkarbutikken Nemo. Der kan du både kjøpa utstyr, melda deg på kurs og ta prøvedykk i tank.
Skating og rock i sentrum
Tivoli kjem til Os i år òg, men ikkje under vårsleppet.
– Tivoli kjem i juli, men det blir hoppeslott for dei yngste under vårsleppet, fortel Geir.
Moteshow høyrer også med, det same gjer torgsal. I tillegg blir det innslag av Os Rockeklubb.
– Det blir ei travel helg for Os Rockeklubb, men rock i Oseana fredag og laurdag kveld. I tillegg har vi to unge gode band frå musikkbingane våre, også kjent frå blant anna UKM; Pink Disease og Ondt i Hode, seier Kjetil Osablod Grønvigh.
– Så har vi fått med oss folk frå Switch Halhjem Skateklubb, som kjem til å rigga opp ein liten park i gågata vi lager mellom S. Tvedt og Paul M. Sælen. Det blir ikkje ei rein oppvising, men skatarane kjem til å visa nokre triks i løpet av dagen.