O jul med din glede i Os
Sjå stor bildeserie frå Julemarknadsdagane og eit storfint besøk på Røykenes.
Bildeserie:
Julemarknadsdagane i Os byrjar etterkvart å verta ein tradisjon.
Tilreisande utstillarar, julenissen i Borgstova, julepynta butikkar, levande dyr og julegåveverkstad samla osingane i sentrum i dag.
Noko vi har gløymt
I Kyrkjetunet kunne kyrkjelydspedagog, Gro Helen B. Skjælaaen fortelja om storproduksjon av julegåver;
– Det vi tilbyr her i dag, er noko som med åra har forsvunne litt frå samfunnet. Vi har lagt til rette for at du med enkle grep kan laga di eiga julegåve.
– Vi syt for materiell og assistanse, og til slutt kan du gå ut herifrå med ei eller fleire ferdig pakka gåver.
Skjælaaen fortel om fleire som vart sitjande i fleire timar og putla på med gavelaging, og i løpet av dagen var det eit renn av folk som var innom verkstaden.
Yrande liv
I sentrumskjerna var det rigga fleire store telt som var spekka med alt frå honning til sauefellar.
Til og med eit telt kor borna kunne sjå teiknefilmar hadde funne sin plass i gatene.
Nystarta Duga hadde rigga seg opp med bålpanne og kakao til dei som ville ta ein varmande pause i tråkket.
Lyshornet Brass sytte for musikalsk julestemning heile dagen.
Nissen i stovo
Eit av dei mest populære innslaga under Julemarknadsdagane i Os er utan tvil å få møta i nissefar og nissemor i Borgstova.
Det vert ekstra spanande, og kanskje litt skummelt når ein stig inn i eit hus frå 1350, og der sit jaggu meg nissen i ein krok.
Kristin Vangsnes Bøe frå kultureininga i Os kommune kunne fortelja om 80 menneske i kø allereie før nissefar var heilt klar, og rundt klokka halv to hadde nærare 300 menneske vore innom i heimen til nissen.
Lappar og strikketøy til folket
Nytt av året var varmestove, kombinert med salsutstilling i det gamle kommunehuset på Kyrkjeflaten.
Hobbygruppa til Os Frivilligsentral sytte for lappar, julebrød med brunost og eit solid utval av handverk ein kunne kjøpa med seg heim.
At folk nytta seg av tilbodet, var det ingen tvil om.
Leiar i frivillig sentralen, Tove Hille rekna med å ha steikt og delt ut om lag 330 lappar i løpet av dagen!
Kor tid kjem han!?
På Er-An Vegkro på Røykenes var det venta stort, raudfarga besøk i kveld.
Mange folk hadde teke turen for helsa på Cola-nissen, og for å sjå på den raude lastebilen med alle lysa på.
Litt før klokka sju rulla først julenissen inn på tunet, men då lastebilen etterkvart dukka opp, vart julenissen rett og slett tydeleg slått av lastebilen kva gjeld merksemd.
Julemarknadsdagane i Os held fram i morgon med marknad og moglegheit for å møta nissefar og nissemor i Borgstova.