Ofra møterom for "friareal"

Bildeserie:

1 av 10

Bertel Humlen, som i februar overtok etter Erik Werner som leiar av Bjørnefjorden Gjestetun, og tok tidleg initiativ til eit lite oppussingsprosjekt i forkant av den planlagte store utvidinga ved gjestetunet.

– Det er krevjande å driva ein liten overnattingsplass. Når 37 rom er det vi har å selja, må totalopplevinga vera så god at vi samla sett er stolt over produktet vi har å selja, seier Humlen.

Bjørnfjorden Gjestetun har hatt ei auke dei siste åra og driv med millionoverskot. Og dei har hatt ein fin start på 2013.

– Det er fullt her i dag og det er fullt i morgon. Våren ser også fin ut, sa Bertel då Midtsiden var oppom tysdag.

Stengte av for å pussa opp

I førre veke var det vinterferie på Vestlandet. Då stengte gjestetunet for å pussa opp fleire rom - og for å riva nokre veggar.

– Kurs og konferanse er viktig for oss, som for dei fleste andre i bransjen. Men det er ikkje berre kapasitet som er viktig, folk møtast på andre plassar enn før.

Eit lite møterom på hemsen over resepsjonen og spisesalen blei ofra til fordel for utviding av loungen, eit lite "friareal" med utsikt ned mot både resepsjonsområde, spisesal og ut mot fjorden.

– Folk sit ikkje berre rundt eit møterom lenger, dei deler seg i grupper og spreier seg rundt om i og utanfor hotellet. Dei gode samtalane kan like gjerne finne stad i ein sofa som ved ein pult.

Maling, golvlegging og møbelsnekring

Det hektiske oppussingsarbeidet omfatta også andre rom. Resepsjonen, spisesalen og kjellarstova har fått nye fargar og nye møblar.

Det er også lagt nytt golv fleire plassar i det vesle hotellet.

– I spisesalen har vi fått nyutdanna møbelsnekkarar til å skreddarsy nokre fine skap- og serveringsdiskar, fortel Humlen.

I bildeserien over ser du korleis Bjørnefjorden Gjestetun har fornya seg.