Ønskjer seg båttur
I helga kjem 36 15-åringar frå heile verda til CISV-leir i Os. Dei håper på båttur i Osskjergarden.

Os CISV er igjen vertsskap for sommarleir for ungdom frå heile verda. Sist gong var for to år sidan på Kuventræ skule. I år skal ungdommane samlast på Nore Øyane skule til tre veker med leirliv under fana "Kvardagsheltar" kor ungdommane skal jobbe med kva dei legg i begrepet heltar både på globalt, lokalt og personleg nivå.
- Det kjem fire 15-åringar pluss ein leiar frå ni land, fortel leirleiar Sigrid Johanne Husøy.
Deltakerlanda er i år Brasil, Frankrike, Estland, Jordan, Italia, Tyskland, USA, Noreg og Ungarn.
Merkar lite
Ungdommane kjem til Os allereie fredag, men skal ikkje på leir før sundag ettermiddag.
- Den første helga skal dei bu heime hos vertsfamiliar over heile bygda, medan leiarene kjem ut hit for å planlegge aktivitetane og leiren, forklarar Husøy.
- Korleis kjem bygdefolket til å merke at dykk er her?
- I svært liten grad, trur eg.
- Denne helga kan det vera at dykk møter grupper av ungdommar på Osøyro eller andre stader rundt i bygda, ellers trur eg ikkje dykk kjem til å merke så mykje til oss.
Osingar som har lyst til å vitje leiren er hjarteleg velkommen 17. juli frå 14-19. Då arrangerar dei open dag kor ein kan få innblikk i leirlivet og møte dei forskjellige kulturane ungdommen representerar.
Håper nokon kan stille med båt
Ein måte håpar ho riktignok at bygdefolk med båt kan merke leiren.
- Vi har veldig lyst til å få til ein båttur frå til dømes Ervikane den andre veka ungdommane er her (11.-14. juli, journ.mrk).
- Om det er nokon som har lyst til å hjelpa oss og stille med båt og som båtførar hadde det vore utruleg kjekt, smilar leirleiaren.
Har du båt og lyst til å stille kan du kontakte leirkomiteleiar Marit Djupvik på telefon 901 09 356.
- Eg må få skryte av leirkomiteen og Marit, skyt Sigrid inn.
- Dei har gjort ein fantastisk jobb med førebuingane og gjort vår oppgåve veldig enkel, smilar Sigrid i det nettopp Marit kjem inn i rommet.
- No har jentene fortalt at dei har lyst på båttur, er det noko meir bygda kan bidra med?
- Vi tek gjerne imot økonomiske bidrag eller frukt og lignande, smilar komiteleiaren Djupvik.
Frå Os til Oslo
Ei som dreg frå Os når ungdommane kjem til Nore Øyane er 16 år gamle Vilde Fyllingen. Ho skal nemleg vera juniorleiar på barneleir ved Engebråten skule i Oslo.
- Kvifor bruker du fire veker av sommarferien til å vera juniorleiar?
- Eg har sjølv vore på både barneleir i Finland og ungdomsleir i USA. Det er så utruleg gøy at no har eg lyst til å bidra som juniorleiar ein gong òg, fortel Fyllingen.
Som juniorleiar skal ho vera eit bindeledd mellom 11-åringane som deltek på barneleiren og dei andre vaksne leiarane.
- Det er dei vaksne som har ansvaret, eg blir meir ein aktivitetsleiar og er med på leikar og aktiviteter saman med ungane, smilar Vilde før ho hjelper til med å bera inn sengetøy og anna utstyr til leiren på Os.
CISV står for Childrens International Summer Village og er ein politisk uavhengig fredsbevarande organisasjon som har tru på å bringe ungar og ungdom saman for felles forståing av ulike kulturar og trusretningar.