Opnar skøytehall fakkelfredagen

I dag startar arbeidet med å legga kunstis-skøytebanen i sentrum. Skøytebanen, som er berekna for born, blei første gang tatt i bruk i fjor, då den var plassert på Telthusplassen.

– I år blir banen plassert litt meir i le for vêr og vind når den kjem i innhuken på rådhuset mellom Asiatisk mat og lokala etter S. Tvedt, fortel kulturkonsulent og skøytegeneral Kjetil Osablod-Grønvigh som blant anna får med seg sentrumsleiar William Lindborg på monteringa.

Telt og musikk

Klok av skade frå i fjor vil dei i år montere telt over skøytebanen samstundes med at sjølve kunstisen blir lagt.

– Teltet og banen blir ståande i allefall i heile desember. Vi jobbar også med å finna ei løysing slik at det skal bli musikk og lys i teltet heile tida.

– Inntrykket frå i fjor var at banen blei godt brukt og var eit populært tiltak.

– Blir det ein større bane i år enn i fjor?

– Nei, det blir den same banen som i fjor. Skulle vi ha utvida den måtte vi ha kjøpt fleire av plastelementa som utgjer kunstisen. Det er først og fremst ei barneskøytebane.

Ny rute for fakkeltoget

Skøytebanen vil bli offisielt opna i samband med fakkelfredagen 1. desember.

– Fakkelfredagen blir i år litt annerleis enn tidlegare då vi startar frå Oseana. Der blir det servering av gløgg og peperkaker før fakkelane tennast og toget går inn til torget, fortel Lindborg.

– På torget blir det tradisjonen tru tenning av julegranen. Er vi heldige, så blir det også smakebiter frå Fonos sin kommande konsert. Planen er at dei skal stå på taket til Torgbygget og synga nokre låter.