Opnar stor juleutstilling

Bildeserie:

1 av 3

Vedholmen Galleri kan sjå tilbake på eit travelt og aktivt år, med rekordsommar, trass i korona-restriksjonar.

Spesielt utstillinga til den folkekjære multikunstnaren, Oddvar Torsheim, trekte mykje folk til galleriet i Øyane.

• Les òg: Oddvar Torsheim fylte kai og veteranbåt utanfor Vedholmen Galleri.

Avsluttar året med stor kollektiv juleutstilling

I morgon opnar årets siste utstilling - ei utstilling med mange kunstnarar.

– Til utstillinga vil ein stor del av kunstnarane tilknytta galleriet vera representerte, fortel dagleg leiar Vibeke Harild.

– Som gjestekunstnar har vi fått med oss Bjørg Thorhallsdottir. Ho hadde ei minnerik utstilling hos oss for 10 år sidan, og eg veit det er mange i bygda som likar arbeida hennar.

– Thorhallsdottir har utruleg lette, flotte, og ja, positive bilde som vi alle treng i den tida vi er i no.

Mykje å velja i

Harild fortel at det vil vera mykje å velja i på juleutstillinga til Vedholmen Galleri.

– I dag har vi lagt siste handa på førebuingane, og når vi opnar i morgon skal det vera flust med moglegheiter til å finna «alternative» julegåver blant grafikk, keramikk, måleri og skulpturar.

Juleutstillinga til Vedholmen Galleri står fram til 20. desember.