Os og Søre Neset i tio

Bildeserie:

1 av 8

Sidan april har det blitt skrive tekstar til revyen «Os i (år totusen og) tio», ei framsyning som har premiere under haustfesten førstkomande laurdag, men som også blir sett opp fredag veka etter.

- Vi har som oftast hatt underhaldning på haustfasten, men då kortare innslag, dei siste åra rundt 45 minutt med ei god ungdomsgruppe, fortel Jan Helge Kordts.

For å få ein betre miks av ungdomar og vaksne på årets haustfest har dei bestemt seg for å få fleire vaksne på scenen og tilby full revy.

- Sidan april har det blitt skrive tekstar, i hovudsak av Runar Drønen, og rett etter sommaren byrja vi å øva.

Noreg, Os og Halhjem
Revyen famnar om langt meir enn Søre Neset, splitta familiar, slapp rumpe og tidleg graviditet er blant emna som blir tatt opp. Oseana, Os sjukeheim og lokalpolitikarar i posisjon får også smaka, og enkelte innslag er endå meir lokale.

- Vi må sjølvsagt innom ferjekaien, i tillegg blir det tulla litt med gartneria her ute.

Musikk av Søfteland og Lyssand
Bak revyen står åtte skodespelarar, sufflør, scenearbeidar, lyd- og lysteknikar, sminkør og musikarar.

- Vi har vore heldige som har fått med oss dei to erfarne musikarane Tord Søfteland og Steinar Lyssand.

I kveld blir det billettsal i ungdomshuset, berre 90 billettar blir lagt ut til premieren.

- Vi har kapasitet til fleire fredag neste veke, då blir det sal i døra. Men til haustfesten førstkomande laurdag set vi fram bord og følgjer opp med dans, så då blir det berre desse 90 vi har plass til, forklarar Kordts.