Osfest: I morgon startar rigginga

Bildeserie:

1 av 4

Osfest byr i år på det som, med god marging, blir den største konserten i Os nokosinne; 5000 skal oppleva Marcus og Martinus på dagtid på hovudscenen laurdagen (6. august).

Billettane blei lagt ut på kvelden 30. november i fjor, 2. februar var det utselt.

– Kva betyr denne suksessen for Osfest økonomisk?

– Uansett er dette bra for festivalen, både for opplevinga av Osfest og at vi tidleg fekk svar på kor mange som kjem, med tanke på planlegging, seier festivalsjef Tor Egil Hylland.

Kven speler kor tid? Sjå nedst i artikkelen.

– For likviditeten er det òg bra, og riggen står der allereie. Men billettprisen er låg, med 290 kroner. Vi skal òg ha fine prisar på mat og drikke (alkoholfritt), dette skal først og fremst bli ein folkefest.

– Det økonimiske veit vi ikkje før i oktober eller november, når vi har alle tala frå heile festivalen. Men blir resten av Osfest like bra som i fjor, og vi sel godt av mat og drikke (alkoholfritt) under Marcus og Martinus-konserten og elles, så kan årets festival vera med på å løfta Osfest 2017.

Dette er nytt i år:

• Utvida med éin dag, Osfest startar i år om torsdagen (til og med laurdag)
• Konsert på hovudscenen på dagtid laurdag (Marcus og Martinus)
• Os Sentrumsforening har marknad under Osfest
• Kjempegøy lager leikeland på Kyrkjeflaten laurdag på dagtid
• Større VIP-telt (aukar frå 27 til 30 meter lengde, framleis 15 metere breidde)
• Mat-teltet blir flytta ned utanfor Kløvertun for å gje betre plass ved scenen
• Ekstern parkering, blant anna på Uvensletta, med buss i skytteltrafikk til Os

Tilbakeblikk på 2015:
Video og bildeserie frå fredagen
Video og bildeserie frå laurdagen
Sjå Osfest 2015 frå lufta - video frå drone
Livet i Os hamn

Russar har kjøpt billett

Hylland fortel at billettsalet til resten av Osfest, utover Marcus og Martinus-konserten, ser mykje likt ut som rekordåret i fjor.

– Det vi ser er at rekkevidda aukar, vi får fleire tilreisande, nokre få kjem òg til å reisa langt.

Tidleg selte dei billett til ein frå Blackburn i England, i sommar er det òg kjøpt billett frå St Petersburg. Elles kjem folk frå både Østfold og Rogaland til Os neste helg.

– Eg har inntrykk av at ikkje alle har fått med seg at du kan kjøpa VIP-billett til ein enkelt kveld, utan å ha festivalpass, men at folk no har byrja å oppdaga dette. Den siste tida har vi selt fleire enkeltbillettar til VIP-teltet, ikkje minst til første festivalkveld, med Myrna Braza og Heine Totland i VIP-teltet.

Det skal vera fire cruise med MS Midthordland, det eine har Os kommune kjøpt (Vossarebels kl 12 laurdag). Det er framleis plass på alle dei tre andre.

– I fjor hadde vi Terje Frigaard på alle, i år er det ulike artistar på kvart cruise. Ofte sel vi mange i slengen når det nærmar seg, og vi har berre 140 billettar til kvart cruise, så MS Midthordland kan fort bli fullasta.

Byrjar å rigga i morgon

I dag er det ei veke til Osfest startar, i morgon byrjar rigginga.

– Fredag byrjar vi å rigga alle telta, laurdag kjem gjerda som skal stå rundt festivalområdet.

Scenen, som er den same som A-ha brukte på Koengen på forsommaren, blir rigga frå måndag.

A-ha brukte ifølgje Hylland 20 meter breidde, Osfest bruker 16 meter, men saman med skjermane blir Osfest-scenen heile 40 meter brei.

360 frivillige står klare

Førsteåret, 2014, og i fjor, var det cirka 310 frivillige i sving med alt frå å assistera opp- og nedrigg til backstage, vakthald, transport og sal av mat og drikke.

– I dag har eg akkurat 360 frivillige på lista mi, det er heilt fantastisk kor folk stiller opp. Nokre har vore med før, andre er nye i år, og så har vi nokre lagleiarar med ekstra ansvar som verkeleg bidrar mykje.

Sjølv om lista er lang er det framleis plass til fleire.

– Det kan skje ting dei siste dagane som gjer at enkelte ikkje kan stilla, så vi fører framleis folk opp på lista om dei vil vera med ei eller fleire økter desse dagane.

Skal det regna seg tomt?

Osfest har vist at både rigg, artistar og publikum toler vatn, debuten i 2014 blei søkk våt, men blei likevel bra.

I 2015 var det betre vêr, i år ser det førebels noko grått ut.

Det er meldt nedbør kvar dag fram til festivalstart, og så vanskeleg som det tydelegvis har vore å spå sommarvêret i år er det nok for tidleg å seia om det vil snu.

Førebels melder Storm lettare vêr torsdagen og sol og 17 gradar fredag om ei veke.

Kven speler kor tid?

Det har vore ei endring i programmet i juli. Området opnar tidlegare laurdag formiddag, klokka 11 i staden for klokka 12.

I tillegg har Suzanne Vega og Odd Norstoga skifta plass i rekkefølga fredagen.

Scene for scene, dag for dag, sånn ser Osfest-programmet ut:

STORSCENEN: «OSELVAREN»

Fredag 5. august (området opnar kl 17)
1. Vamp 18.00
2. Frode Alnæs 19.50
3. Suzanne Vega 21.10
4. Nik Kershaw 22.40
5. Odd Norstoga 00.15

Laurdag 6. august (dagtid området opnar kl 11)
• Marcus og Martinus

Laurdag 6. august (området opnar kl 17)
1. Donkeyboy 18.00
2. Sigvart Dagsland 19.10
3. The Holy Ghosts 20.30
4. Neil Finn 22.10
5. Mike & the Mechanics 00.10

LAURDAG, OSEANA (kl 16, restauranten er open):
• Jazzkafé med Hans Marius Andersen kvintett

VIP-TELTET: «AUSEFATET»

Torsdag (frå kl 18)
• Myrna Braza
• Heine Totlands Sensational Rock & Roll Circus

Fredag (frå kl 15 til 18)
• Hear Me Roar
• Trine Rein

Laurdag (frå kl 14 til 18)
• Vorspiel med Bård Ose og Finn Tokvam frå P.I.L.S.

FESTIVALCRUISE MED MS MIDTHORDLAND

Fredag kl 15: Frode Alnæs
Laurdag kl 12 (kommunalt): Vossarebels
Laurdag kl 14: Trine Rein
Laurdag kl 16: The Holy Ghost

Midtsiden samleside: Osfest