Østervold tilbake for fullt

Bildeserie:

1 av 8

Lysekloster slo Øystese 3-1 i dagens heimekamp. Kristoffer Østervold skåra to av måla, men mannen bak 20 nettkjenningar i 2017 er totalt berre oppe i 5 mål etter 10 rundar.

– Kampen onsdag mot Sogndal 2 var min andre heile kamp i år, og den første som skadefri, fortel Østervold.

I serieopninga var han på benken med skadd auge, men blei skifta innpå i 44. minutt og skåra hattrick. Etter ein kamp utan nettkjenning mot Viking 2 venta Fana, men i 25.-30. minutt blei han skadd i ankelen.

– Fem mål på tre heile og to halve kampar får vera greit. Held eg meg skadefri kan eg kanskje koma opp i 20 i år òg, seier den offensive austevollingen.

Møtte tidlegare lagkameratar

Øystese stilte med søftelendingen og den tidlegare Lysekloster-spelaren Henrik Mortensen Mjelva i mål.

Frå start for Øystese spelte òg Sebastian Skåre Tune, Erik Kanestrøm og Divaldo Cardoso, som Østervold tidlegare har spelt med i Os.

– Eg visste at Sebastian spelte i Øystese, men ikkje at Erik hadde gått frå Os eller at Divaldo var tilbake på Øystese. Det var kjekt å møta dei igjen.

Østervold gav Lysekloster leiinga i 7. minutt og heada inn 3-0 i 59. minutt. 2-0-målet blei skåra av Martin Pedersen i 54. minutt.

– Det var i grunnen aldri spennande. Vi hadde ballen klart mest, men ramla dessverre litt ned i tempo då vi følte at jobben blei enkel.

Øystese reduserte til 3-1 ved Tonny Tysnes i 62. minutt.

Tre poeng frå toppen

Sotra vann i går og leiar framleis med tre poeng meir enn Lysekloster.

Lysekloster sin neste kamp går borte mot Fyllingsdalen på 4. plass laurdag om ei knapp veke.

• Tabell og terminliste