Overraska!
Ordførar Terje Søviknes (Frp) er overraska over dei foreslegne kutta i antal politikontorer i Hordaland. – Eg skjønner ikkje kva dei tenkjer på.

Lensmannskontoret på Os er foreslegen lagt ned i politianalysen som skal handsamast av stortinget til våren.
– Eg skjønner ikkje kva dei tenkjer på når dei vil leggja ned kontora i dei mest folkerike vekstområda rundt Bergen.
– At dei vil leggja ned Os, Bergen Sør, Bergen Vest, Askøy heng ikkje på greip, seier ordførar Terje Søviknes.
Vil få bykriminalitet
Fylkeskommunen har lagt ein strategi der dei vil styrke dei lokale sentra rundt Bergen.
– Når vi no freister å byggje opp sentra som Osøyro, Arna, Straume og Knarvik, så vil det ikkje berre dra med seg dei positive sidene.
– Vi må berre erkjenna at vekst og utvikling av byliknande sentra også vil kunne dra med seg byliknande kriminalitet.
– Då kan ein ikkje byggje ned politiet på desse plassane.
– Vi bør ha eit lokalt politikontor i Os, slår Søviknes fast, og støttar med det vurderinga til lensmann Oddbjørn Dyrdal.
Vil slå ring om kontoret
Ordføraren vil så snart som råd fremja ein sak for politisk handsaming.
– Eg opplever at vi tidlegare har stått samla om å slå ring rundt det lokale lensmannskontoret, og vil difor fremja ei sak til kommunestyret eller formannskapet så snart som råd er.
– Os, med den veksten vi opplever, har både ei størrelse og ei kraft til å kunne krevja eit lokalt politi.
– Sjå heller på oppgåvene
Søviknes peikar på at analysen heller burde ha sett på kva oppgåver politiet utfører, i staden for den store fokusa på organiseringa.
– Kva brukar politiet ressursane på i dag?
– Er det rett å skulle kreva at politiet må leigast inn som vakter på kultur- og idrettsarrangement og på den måten binda opp store ressursar, som kunne vore nytta til aktivt politiarbeid.
– Eller kva med fangetransport og framstilling i retten. Der trur eg det går vekk mykje politiressursar, kor ein i staden kunne nytta fengselsvesenet eller kanskje til og med private ressursar, avsluttar Terje Søviknes (Frp).