P4 delte ut Syden-turar
Charterbussen innom Os: Først dukka dei opp på døra til Kjersti Een, så stilte dei seg ved Esso-stasjonen og delte ut yttarlegare 11 Syden-billettar.


I morgon reiser 12 osingar til Syden på P4 og Star Tour si rekning.
– Eg visste ingenting og skjønte ikkje kva dei ville då dei banka på døra, seier Kjersti Een.
I vår kjørte Charterbussen rundt i norske storbyar og delte ut Syden-billettar, i haust er dei rundt på mindre plassar, tre veker på rad.
– Førre veke var vi i Selvik, i dag blei det Os. Det er førebels hemmeleg kvar vi skal neste og siste runde, seier Kjetil Hugin frå P4.
– Mannen til Kjersti var ein av mange tusen som har tipsa oss på facebook om kven vi bør senda til Syden.
Reiser i morgon
Etter å ha vore heime på døra til Kjersti kjørte bussen ned til Os sentrum. Først prøvde dei å huka tak i nokon på bussterminalen, så stilte dei seg opp ved Esso-stasjonen.
P4 sendte direkte frå bussen og annonserte kvar dei sto, og då gjekk det ikkje lang tid før radiolyttarar steama til.
Men først ut var eit knippe drosjesjåførar.
– Kva? Må eg reisa i morgon? sa Pål Heimtoft, førstemann til mølla.
Han gav billetten vidare til Martin Eikeland og Anette Koldal, to kollegaer, også dei frå Os Taxi, som tilfeldigvis var innom Essoen for å levera bilen på service.
Også eit par andre måtte snu då dei forsto at dei ikkje kunne velja avreisedato sjølv, men det gjekk ikkje lang tid før reiseklare osingar meldte seg.
Turen går til Maspalomas
Charterbussen er eit samarbeid mellom P4 og Start Tour, som fyller 40 år i år.
Dei som fekk tur reiser til Maspalomas, nokre få kilometer frå Playa del Ingles på Gran Canaria.
Der får dei ei veke på 4-stjernershotellet BlueStar Dunas.