På delt førsteplass

Redningsselskapet kårar Noregs nasjonalbåt, og mange av dei 1200 som har sendt inn nominasjon meiner oselvaren er beste kandidat. Nominasjonsrunden stenger 1. mai.

Kjetil Vasby Bruarøyonsdag 29. apr. 2009 13:15

I Noreg har vi både nasjonalfugl og nasjonalinstrument - men ingen nasjonalbåt. Det vil Redningsselskapet gjera noko med. I slutten av februar opna dei for innsending av nominasjonar, og sist nssr.no skreiv om saka (20. april) låg oselvaren på delt førsteplass saman med nordmørsgeita.

- I denne omgangen skal 10 båtar veljast ut, og så kan vi stemma for å finna vinnaren. Nordlendingane er flinke til å mobilisera, så det overraskar meg ikkje om nordlandsbåten stikk av med den gjeve tittelen, seier dagleg leiar i Oselvarverkstaden, Åsmund Lien.

- Men det hadde passa veldig godt om oselvaren vann, meiner han.

Båt med liv i
Båtbyggar Berit Synnøve Osmundsen sit i ein oselvar frå rundt 1880. Ein seksæring som har fått ny saum, ny dørk, nye tofter og nye beslag.

- Det er sikkert mange nominerte båtar med imponerande tradisjon, men eg synes nasjonalbåten skal bli ein båt med liv i, ein båt som folk framleis bygger og bruker, seier Berit.

- Dagens produksjon er eit poeng
Fleire av dei nominerte båtane har lange, norske tradisjonar, men få blir produsert i dag, og truleg ingen i same skala som oselvaren.

- Oselvarverkstaden produserer systematisk etter gamal byggeskikk. Kor lenge oselvaren har blitt bygd, og kor tid den fekk namnet, er uvisst. Men i fjor leverte vi bygg nr. 60 frå Oselvarverkstaden, og det viser at oselvaren er ein ettertrakta båt også i dag.

Lien meiner kampen om tittelen bør stå mellom åfjordbåten, strandebarmaren, nordlandsbåten, nordmørsgeita og oselvaren.

Vil du stemma på oselvaren? Då kan du senda SMS med teksten: "båt oselvar" til 2225.
Nominasjonsrunden stenger 1. mai.

Les meir om kåringa på nssr.no