På krykker

Bildeserie:

1 av 3

OBS! Os-Austevoll er framskynda frå kl 15.00 til 14.00 laurdag 31. oktober, grunna lysforhold.

10 minutt ut i kvalik-kampen mot Austevoll laurdag, skadde Tim høgre ankel i eit angrep. No går han heime på krykker, sjukmeldt frå jobben som tømrar.

- Eg har vore og fått tatt bilde av foten. Det er ingen brot eller leddband ute av drift, men førebels klarar eg ikkje å gå på foten, seier Tim Henrik Sperrevik.

Liknande skade før
Laurdag spelar Os avgjerande kamp om opprykk, og sjansane er store for at dei må klara seg utan mannen som har skåra 19 av 64 seriemål i år. I tillegg har han kanskje fleire målgjevande enn skåringar.

- Det er nok 80-90 prosent sjanse for at eg må stå over, men det er eit par ting som gjer at magekjensla seier at eg blir klar, seier Tim og forklarar:

- Foten er ikkje hoven og ikkje vond når eg vippar den opp og ned, berre sidelengs. Kan eg gå på foten onsdag så kan eg sikkert gå denne skaden av meg før helga.

Han har ikkje hatt liknande skade i denne foten før, så sidan den er utan slark verker det kanskje meir enn elles. Dessutan blei Tim rask speleklar med liknande skade i den andre foten for nokre år sidan.

- I opprykkssesongen 2006 hadde eg ein heilt lik skade i venstre fot. Helga etter spelte eg heile kampen borte mot Lyngbø, fortel han.

- Austevoll får problem
Tap på bortebane ser ikkje Sperrevik på som noko problem.

- I 2006 reiste vi til Hovding med 4-0 i bagasjen, du såg jo korleis det gjekk. Mål imot og fullt stress i leiren, sjølv om vi hadde mykje å gå på.

Den gong var det så vidt Os klarte å vinna samanlagt.

- På Austevoll verka det som om dei låg forsvarsrekka fem meter lengre bak, og ein mann i rom mellom forsvar og midtbane. Slik tok dei over i andre. Men vi har eitt bortemål, og var svært nær på mange fleire. På Kuventræ blir det knalltøft for gjestane, som dessutan ikkje akkurat har gras som favorittunderlag, seier Tim Henrik Sperrevik.