På skjermen i kveld?

I februar song han seg vidare i UKM, i april kom Elias Grimstad Salbu vidare frå pre-cast i Bergen i årets Norske Talenter på TV2.

Fredag for ei veke sidan var første sending i årets Norske Talenter og der fekk vi ikkje sjå talentet frå Os.

– Eg veit ikkje om eg blir vist eller kor tid, fortel Elias til Midtsiden.

Unge Salbu har naturlegvis ikkje lov til å seia korleis det gjekk på hovudaudition i Christiania Teater i Oslo i juni.

– Kanskje i program nummer 5

Midtsiden kontakta TV2 for å høyra om vi får sjå osingen på TV, og i så fall kor tid.

– Han er førebels ikkje i nokre program, men han kan bli det.

– Vi sit no og plukkar ut deltakarar til program 5, fortel redaksjonssjef Anne Skaardal i Monster Entertainment.

Lagde musikkvideo

Elias kjem frå ein musikalsk familie, både foreldra og søstera speler fleire instrument, i heimen går det i alt frå piano og fiolin til gitar og tverrfløyte.

– Eg har spelt fiolin frå eg var 7 år. For nokre år sidan byrja eg også å spela gitar.

Elias skriv også eigne tekstar og komponerer eigne låtar, men han har ikkje framført nokre av desse enno.

– Det kan henda eg går i studio i Allakten og speler inn nokre låtar, Kjetil Osablod Grønvigh har invitert meg, fortel han.

– Og så har eg allereie spelt nokre coverlåtar som er filma og publisert på Youtube, den eine av Feel It Film frå Os, seier Elias G. Salbu.

Her kan du sjå Elias framføra Adele sin Rolling in the Deep (Foto: Feelitfilm):