midtsiden

På skule med Solskjær

Frode M. Øvredal er tatt ut til treningssamling med Ole Gunnar Solskjær. - Frode er eit stort talent både ute og i mål. Han skulle vore klona, seier trenar Arve Sennesvik.

Av: Kjetil Vasby Bruarøy

StatoilHydro sitt fotballakademi med Ole Gunnar Solskjær er det nærmaste du kjem landslagssamling for 14- og 15-åringar.

Krinsen nominerer medan fotballforbundet i samarbeid med arrangørane plukker ut 25 gutar og 25 jenter dei vil ha med til ei veke med talentutvikling i Kristiansund i slutten av juni.

- Eg fekk beskjed i førre veke, dei trengte adresse til å senda flybillettane, fortel Frode.

- Det skal bli veldig spennande, nivået er sikkert høgt både på dei andre spelarane og på sjølve fotballskulen, trur han.

God på heile banen
Frode er frå Hegglandsdalen og har spelt for Os sidan han gjekk på barneskulen. Ifølgje trenaren utmerkte han seg tidleg som eit stort talent.

- Han er stor, sterk og rask, og har ein utruleg teknikk, seier Arve Sennesvik.

- Det siste året har han stort sett stått i mål, og det er keepertalentet han vil satsa på vidare. Men det verste er at han også er ein av våre beste utespelarar, så av og til må vi rett og slett sleppa han ut på banen.

Det skjedde blant anna i ein avgjerande kamp i Sognefjord Cup i fjor sommar. Det sto 0-0 og motstandarane leia med god margin på cornarar. Då kampen gjekk mot slutten kom utkvilte Øvredal-bein på banen, og spelte fram laget til skåring og siger.

- Frode skulle vore klona, så eg hadde ein i kvart ledd. Då hadde ingen slått oss, trur Sennesvik.

På krinslaget sidan i haust
Frode er fødd i 1995, men steppar også inn som målvakt på 94-laget av og til. I haust blei han tatt ut til krinslaget. Han var nominert både som utespelar og keeper, men bestemte seg i uttaket for å satsa på å vakta mål.

- Det er kjekt å spela ute òg, men eg liker meg godt i mål og har bestemt meg for å satsa vidare som keeper.

I helga var han på samling med krinslaget, og Hordaland vann begge sine kampar.

- Eg lærer mykje på samlingane, og ser verkeleg fram til akademiet. Einaste minus er at eg går glipp av Sognefjord Cup i år, seier Frode Øvredal.

Her kan du lesa meir og sjå film om StatoilHydro sitt fotballakademi.

Fleire saker