– På tide å støtta

– Å få slike summar frå privatpersonar i Os, så lenge etter at vi starta OKK-kampanjen, viser at det framleis er folk som går med tankar om å støtta Oseana økonomisk, seier ordførar og leiar for byggekomiteen, Terje Søviknes.

OKK-kampanjen (Os kunst- og kultursenter) starta i juni 2008, eit halvt år før byggestart blei vedtatt, eit knapt år før byggestart. I utgangspunktet var målet å samla inn 10 millionar kroner i støtte frå privatpersonar og bedrifter.

Nye rundar har blitt gjort og det har no, utanom støtte og utvida støtte frå Per Grieg sr og Grieg Foundation, kome inn rundt 26 millionar sponsorkroner til Oseana.

Det største på lang tid

Helge Haugland var den første av dei to ferskaste gåvegjevarane. Han støttar Oseana via selskapet sitt, Bjørnefjorden Hjertesenter AS, med 100.000 kroner.

– Eg synes det er naturleg at vi støttar prosjektet så godt vi kan, alle som kan. 100.000 kroner er ikkje så mykje i denne samanhengen, men er vi mange nok som kjem med tilsvarande støtte så blir det pengar av det, seier hjartespesialisten.

Haugland blir dagleg minna på kva som har reist seg og snart skal opna på Mobergsneset. Både frå kontoret i Irisgården og husværet på taket av same bygning har han utsikt mot Oseana.

– Oseana må vera det største som har skjedd forkulturlivet i heile regionen på svært lang tid. Prosjektet er imponerande, som operahuset i Sidney, og når vi ser kva som er i framdrift så er det berre å trø til.

Starta med 20.000

Haugland kontakta Søviknes på laurdag. Måndag kom ein annan osing og ville gje tilsvarande sum.

– Eg har støtta prosjektet sidan første stund og starta med å kjøpa nokre stolsete for 20.000 kroner, fortel gåvegjevaren, som ønskjer å vera anonym.

– Så ville vi venta, for eg meiner staten har ei plikt å koma på banen med midlar til dette prosjektet. Men så skjedde ikkje det, og då synes eg synd på dei som har stått i spissen for dette, som må kava seg ihel for å få finansieringa til å gå i hop. Det var på tide å koma med meir støtte.

Måndag kontakta han ordføraren og sa at han ville støtta med 100.000 kroner, «visst det var greit».

Ope for fleire

Søviknes legg ikkje skjul på at intensiv jobbing og mange møter står bak mykje av støtta som har kome inn. Men dei to fine summane som kom uavhengig av kvarandre laurdag og måndag, kom overraskande på.

– At det kjem folk med sånne summar fem veker før opning seier oss at vi bør vera endå tydelegare på at det framleis er ope for å bli Oseana-venn, seier ordførar Terje Søviknes.