På veg mot dobbelt opprykk?

Mens A-laget leiar 4. divisjonsavdelinga si med 5 poeng ned til Lyngbø ligg Os 2 på 2. plass, 3 poeng bak serieleiar i 5. divisjon, Osterøy.

Os 2 speler borte mot Osterøy søndag 2. september, men 2. plass er uansett godt nok til opprykk, og det er 6 poeng ned til Nymark på 3. plass.

• Sjå tabell på fotball.no

12 mål på 2 kampar

Os 2 har starta hausten med 7-0-siger over Dale og 5-2 over Vaksdal i går.

I kampen mot Dale blei det hattrick av Steffen Kvamsdal, i tillegg skåra Simon Moberg Søvik, Trym Hjørnevik, Anders Havsgård og Christoffer Hafsås.

Mot Vaksdal skåra Elias H. Myrlid og Vegar S. Ludvigsen to mål kvar, i tillegg var Kvamsdal på skåringslista igjen.

Fleire mål, færre baklengsmål

Dale og Vaksdal er ikkje dei tøffaste motstandarane, men del av ein statistikk som er langt betre enn i fjor.

– Os 2 skåra 76 mål i fjor, men sleppte inn heile 62 på 22 kampar. Vi har hatt fokus på det å unngå baklengsmål, i tillegg er det nok medverkande at gutane har blitt eit år eldre, seier trenar Martin Røttingen Eidsvik.

Snittet i 2017 var 2,8 baklengsmål per kamp. Etter 13 kampar i 2018 er snittet nede i 1,8.

Samtidig skårer dei meir, 4,4 per kamp mot 3,45 i 2017.

• Sist Os klarte dobbelt opprykk var i 2009

Frå 16 til 20 år

Med unntak av nokre kampar der eldre spelarar frå A-laget treng trening, består stallen til Os 2 i hovudsak av spelarar fødd i 1998, '99 og 2000.

– Vi har òg med nokre yngre spelarar, dei to yngste i går var Henrik Tysse Sperrevik og Elias Heggland Myrlid, begge fødd i 2002.

Elias skåra to mål heime mot Vaksdal.

– Det blir litt sirkulasjon, i haust er det 3-4 stykker som reiser vekk på skule, samtidig har det kome nokre tilbake. Vi har nyleg fått tre 20-åringar tilbake, Ådne Onarheim, Vegar S. Ludvigsen og keeper Kasper S. Færøvik.

Færøvik var reserve for A-laget i toppkampen fredag og spelte heile kampen for Os 2 i går.

– Det er litt av utfordringa når du trener eit andrelag, men samtidig er ungdomen i god form og godt skulert, dei veit kva rolle dei har. Mot Dale spelte vi med 9 nyare spelarar i 2. omgang, mot Vaksdal starta vi med 5 som har spelt lite for oss i vårsesongen. Dei klarte seg likevel veldig fint, synest Eidsvik.