Pirat med ambisjonar og Stifler si mor
Sjølv om 60° Nord Os internasjonale filmfestival rundar av laurdag, er det film i Oseana også søndag.
Søndag 29. april, etter over ei veke med filmfestival i huset, er det ein ny runde med bygdekino i Oseana.
For dei små kjem det ein mindre vellukka piratkaptein, med desto større draumar.
Dei litt eldre får eit gledeleg gjensyn med ein legendarisk venegjeng frå USA.
Kampen om Årets pirat
I "Piratene!" møter vi Piratkapteinen - ein grenselaust entusiastisk, men kanskje ikkje så vellukka, havets skrekk. Med eit lurvete mannskap og tilsynelatande blind for at han har alle odds i mot seg, ber Kapteinen på ein stor draum: å slå sine bitraste rivalar Svarte Bellamy og Huggert-Liz i kampen om den ettertrakta prisen Årets Pirat!
Denne jakta fører våre heltar ut på ei lang reise, heilt frå kysten av den eksotiske Blod- øya og heilt til dei skoddelagde gatene i det viktorianske London. På vegen må dei kjempe mot ei grusom dronning og slå seg saman med ein ulukkeleg forelska ung vitenskapsmann, men dei mistar aldri av synet det ein pirat elskar aller mest - nemleg eventyr!
Dette er eit herleg eventyr, fullt av gode karakterar som garantert set deg i god stemning! Filmen har norske stemmer og aldersgrensa er 7 år.
Stiflers mamma er tilbake!
I "American Pie: Reunion" får vi eit gjensyn med heile venegjengen frå den fyrste "American Pie" filmen. Det er high- school-gjenforening i East Great Falls, og i løpet av ei etterlengta helg oppdagar dei kva som har forandra seg, kven som ikkje har gjort det, og at tid og avstand ikkje kan bryte gode vennskapsband.
Sommaren 1999 ga fire puslete unggutar frå Michigan seg i kast med sin misjon: å misse jomfrudomen. I løpet av åra som har gått har Jim og Michelle gifta seg og fått born, medan Kevin og Vicky har splitta opp. Oz og Heather har vokse i frå kvarandre, og Finch draumer framleis om Stifler si mor. No vender barndomsvennane heim igjen som vaksne for å mimre om og la seg inspirere av dei hormonelle tenåringane frå fortida.
Har hormonane frå tenåra roa seg? Eller kjem dei opp i samme pinlege situasjonar som tidlegare?
"American Pie: Reunion" har 11 års aldersgrense.