President på avspasering

Tekst: Susann Heggland og Fredrik Rikstad, studentar utplassert hos Midtsiden.

Håvard Grøteide er eit av dei unge fotballtalenta i Os. Men forsvarsspelaren, som også har fått litt erfaring med A-laget, har seg ein liten pause frå fotballen.

– I russetida kjem eg til å vera tilskodar. Eg har snakka med trenaren min om dette og han forstår. Når eg skal trena vil eg alltid gje 100 prosent, det klarer eg ikkje no når russetida står på.

I tillegg til at feiringa krev sitt er Håvard president.

– Kva som gjorde at du melde deg som russepresident?

– Det byrja med at nokon venar av meg ville at eg skulle stilla og etter ei stund bestemte eg meg for å gå fullt inn for det. I tillegg håper eg at mitt bidrag kan vera med på å gjera russetida så bra som mogleg.

– Kva er dine oppgåver som president?

– I mi rolle som russepresident har eg det ovarordna ansvaret for kva som blir vedtatt og utført av styret, fordela oppgåver og få ut informasjon. Eg føler meg heldig som er leiar for eit så flott styre. Vi har mange gode personar som er med og hjelper meg i å nå målet til å få ei god russetid.

– Med presidentjobben så følgjer vel også tid på talestolen på Kyrkjeflaten 17. mai. Har du byrja å skriva på talen?

– Eg har tenkt litt på kva talen skal innehalda, men eg har endå ikkje skrive ned noko.

I tillegg til ein prat om russetida og fotballen har Grøteide fått svara på nokre av spørsmåla vi har stilt andre i tidlegare fredagsportrett:

– Kvar i verda vil du helst bu?

– Eg vil helst bu nær sjøen sånn eg gjer no, eg har budd på Vestlandet heile livet og liker meg her.

– Når var sist gong nokon gjorde deg glad?

– Sist gong nokon gjorde meg glad var for eit par minutt sidan, for då fekk eg pizza frå Kaien Mat.

– Viss du hadde vunne ein million, kva hadde pengane gått til?

– Hadde eg vunne så mykje pengar ville eg ha spart og heller sett på investeringer for framtida enn å bruka dei no.

– Kva skal du i sommarferien?

– I sommarferien har eg planer om å dra på Tysnesfest, reisa på hyttetur og å spela mykje fotball. Resten tar eg som det kjem.

– Kva er din største draum?

– Min største draum er å få meg ein jobb som eg trivst i.

– Nemn tre ting du ville hatt med deg viss du var stranda på ei aude øy?

– Då ville eg hatt med meg kjærasten min, ein satellitt-telefon og vatn.

– Kva er du sterkast og svakast i?

– Mi sterkaste side trur eg er at eg inkluderer andre, mi svakaste side er at eg lett kan bli irritert.

– Kva liker du best å gjere på fritida di?

– Å spela fotball og å vera med venar og med kjærasten min.