Pressa seg inn og slo

Han var livredd, mannen som ringte politiet og fortalte om gjeng utanfor huset, ein av dei med ein hammar, på veg inn i bustaden for å slåss.

Kjetil Vasby Bruarøymandag 23. nov. 2009 21:41

Måndag kveld tok ein mann seg inn i ein bustad på Søfteland og slo ein av gjestane i hovudet.

- Han hadde hammar, men brukte den ikkje, seier operasjonsleiar Oddvar Norfonn til Midtsiden.no.

Livredd og forvirra
Det var klokka 17.40 at ein mann ringte 112 for å be om hjelp av politiet.

- Han var tydeleg vettskremt og gav oss til og med feil adresse. Først sendte vi hundepatrulje frå Fana og Åsane mot Arna, men så fekk vi beskjed om at dette var i Vindalsvegen på Søfteland, fortel Norfonn.

Meldinga gjekk ut på at ein gjeng på fleire enn fire, ein av dei med hammar, truga dei som var i bustaden og ville ta seg inn i huset.

Pressa seg inn og slo
Ein av personane tok seg inn ei open dør. Ein av dei som var i huset prøvde sperra døra, men klarte det ikkje. Så skal han ha slått ein av dei som var gjest i bustaden, før han stakk frå staden.

- Patruljen som kom først fram meldte om kaos på staden. Den antatte gjerningsmannen var då vekke, og ingen på staden vil melda det som har skjedd.

Saken får karakter som «ordna på staden».

Hammaren skal ikkje ha blitt brukt, verken til å bryta seg inn eller til å slå med. Men gjerningsmannen var neppe ute på tømraroppdrag heller.

- Nei, det tvilar eg på, seier Norfonn.

Dei fleste involverte skal vera i 20-åra.