Promillekjøring og båttjuveri
Politiet tok i går ein mann i 50-åra, mistenkt for promillekjøring på Moberg. Frå Lepsøy er det sakna ein båt med 30 hk påhengsmotor.
Politiet fekk måndag melding om funn av sykkel i Finnebrekka og bil med stor last på veg mot by'n.
– Bilen blei stoppa på Nesttun. Den hadde blant anna mykje last på taket, og det er oppretta sak, i tillegg blei den avskilta grunna manglande EU-godkjenning, fortel politioverbetjent Terje Sperrevik.
Promille på Moberg
Måndag i 19.30-tida blei ein bilist stoppa på Moberg.
– Føraren, ein mann i 50-åra, er mistenkt for promillekjøring.
– Politiet bør få straff
Ei kvinne som måndag formiddag ringte Midtsiden-redaksjonen fortel at patruljebilen ikkje overheldt vikeplikta då ho skulle over eit fotgjengarfelt ved Esso-stasjonen.
– Dei stoppa til slutt, men då sto dei heilt inne på fotgjengarfeltet, med hjørnet på bilen nesten inntil meg. Eg gjekk på tur med to hundar og hadde eg gått litt fortare kunne dei blitt påkjørt, seier ho.
– Dei som har vikeplikt skal ikkje uroa den dei viker for. Her synest eg politiet, som andre, skal få gebyr, elles vil eg rapportera det.
Sperrevik seier han ikkje har høyrt om episoden, men seier han vil følgja det opp internt.
– Om ikkje vi er på utrykning skal vi naturlegvis retta oss etter dei same trafikkreglane som andre, seier han.
Ber om tips etter båttjuveri
Ein gong mellom 1. juni og i går er ein bår stolen frå Lepsøy.
– Ein Viksund med 30 hk er sakna og vi er interesserte i tips.
Brann ved Moldegård
Måndag kveld rykte politi og brannvesen ut på melding om branntillaup på ei fylling ved Smievågen.
– Ein turgåar meldte ifrå. Det var ikkje opne flammar, men mykje røyk frå fyllinga, fortel varabrannsjef Arne Monsen.
Brannvesenet kom rett frå dykkeøving til Smievågen og sløkte brannen fort.